ORANJESTAD, Aruba – Veld di S.V. Caiquetio a ricibi for di Arubaanse Voetbal Bond y Minister di Salud Publico, Cuido di Nos Grandina y Deporte, Dr. Carlos “Alex” Schwengle, algun bombio pa asina por cambia esunnan cu ta kima. E bombionan aki AVB a ricibi for di CONCACAF pa asina nan por yuda e organisacionnan di Aruba.
Un di e problemanan cu e clubnan tin cu ta dispone di luz, ta cu nan tin diferente bombio kima. “Pa cada bombio cu nos ta cambia, ta costa nos hopi placa. Den un combersacionnan cu nos tabatin cu CONCACAF tabata a base di kico nan por yuda nos futbol na Aruba”, Presidente di AVB, Ing. Richard Dijkhoff a expresa. Bombionan ta hunga un rol hopi importante pe clubnan.
CONCACAF a pone disponibel diferente bombio pe clubnan cu tin e necesidad pa cambia e bombionan kima. AVB acerca Minister di Deporte y Minister di Husticia haciendo peticion pa yudansa, unda a pidi e cooperacion di Brandweer pa cambia e luznan. Presidente di AVB ta sumamente orguyoso di por a contribui cu e clubnan.
Directiva di S.V. Caiquetio tabata sumamente contento di a ricibi e bombionan, pasobra nan mes tabata di acerca AVB pa pidi yudansa pa haya bombio nobo. AVB mes ta haci uzo di e veld di Caiquetio pa weganan di Mayor y Junioren. S.V. Caiquetio ta agradecido di e yudansa cu nan a ricibi.
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.