Home » Operador local di tour satisfecho cu direccion cu ta hibando turismo crucero

Operador local di tour satisfecho cu direccion cu ta hibando turismo crucero

by sxm
0 comment 62 views

ORANJESTAD – Diasabra ultimo a realisa un bon bini special pa e pasaheronan di e crucero Disney Fantasy. Como operador local di tour, Jean Carlos Espinal a comparti su pensamento di e esfuerzonan cu Gabinete Mike Eman ta haci pa permiti e segmento aki di nos turismo florece ainda mas. “Mi ta hopi contento con e ta te cu aworaki y mi ta spera cu e sigui mehora,” asina e director di AGW Tours a comenta. E tin mas cu dies aña trahando riba waf y a mira cambionan grandi sosode den e ultimo añanan, vooral full e structura di Welcome Plasa y cu turistanan cu a yega di bin Aruba ta tuma nota di biaha di dje.

El a keda asombra pa tur loke Oranjestad Business Improvement District (OBID) y Aruba Tourism Authority (ATA) a trece e mainta, manera disfrasnan di Carnaval, banderin di Aruba y te hasta cuk’i pinda. Espinal a conta di e turistanan cu el a compaña pafo “na momento cu nan a crusa e porta, nan a bisa ‘Wow…Happy island,’ kier men cu nan a sinti esey berdad. E clientela di Disney Cruise Line ta hopi diferente pasobra ta casi den su totalidad famia chikito y grandi. Esaki ta nifica mas seguridad di entrada pa e operadornan di tours.

“Nos ta biba di turismo y loke nos ta spera ta cu nos por haya mas barco crucero cu por bin den e temporada di low season,” Espinal a menciona indicando cu esey ta e temporada cu ta aden actualmente. Espinal ta conta con 10 aña pasa tabata papia di un of dos barco pa luna durante ‘low season’ pero cu awendia tin practicamente un pa dos barco pa siman. “Si por logra tres barco pa siman mes, mi ta kere tur hende lo por biba hopi bon.”

Esey ta algo cu ATA trahando fuertemente riba dje y segun Patrick Melchiors cu ta nan Destination Services Manager, ta premira cu na 2018 Aruba lo conta cu yegada di un 50 mil pasahero mas, compara cu 2017. Ademas di traha riba e relacion cu companianan di crucero, tambe ta enfoca riba e facilidad di waf di Oranjestad y brinda un miho experiencia. Aruba ta un marca bon gusta den e mundo di crucero y Espinal ta duna un idea di pakico.

“Tur turista, no solamente di Disney, pero tur cu ta yega Aruba y cu ta duna un comparacion cu e otro islanan, ta keda asombra cu Aruba vooral pa e limpiesa. Dus nos ta hopi contento cu e pueblo di Aruba ta haci esaki hunto cu Gobierno di Aruba,” segun e operador local di tour. Fuera di e limpiesa turistanan ta nota cu na Aruba hende ta hopi social y semper ta dispuesto pa yuda. A base di esey Espinal ta keda cu Disney su cruceronan lo ta un exito den futuro.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio