Home » Karel Maduro di MEP: PM Eman ta trata e pueblo di Aruba manera cu ta di “Buchi-Landia” e pueblo ta!

Karel Maduro di MEP: PM Eman ta trata e pueblo di Aruba manera cu ta di “Buchi-Landia” e pueblo ta!

by sxm
0 comment 65 views

Pueblo di Aruba, ta un tristesa pa lesa y compronde, con PM Eman ta tratando nos pais. E prome punto cu mi kier a trece padilanti ta e asunto di huurmento di edificionan priva. Campañanan electoral uno tras di otro, AVP a propaganda di baha of kita huurmento di edificionan priva. Muy en particular despues cu AVP a inventarisa y a haya sa cu ta 68 mil meter cuadra ta wordo gehuur, y na edificionan bashi ta casi mesun meternan cuadra tabata tin. Mas o menos 17 edificionan bashi AVP su gobierno a hereda, di cual AVP a renoba solamente dos. Loke nos pueblo mester sa ta cu AVP su plannan tabata completamento otro. Su prioridadnan original tabata a base di rapportnan di FESCA y di Fundacion Digna Herrera Lacle. Dos instituto científico di AVP, di cual sr. Richard Arends tabata presidente di FESCA, cu a duna señalnan di preocupacion. E problemanan principal señala tabata chollernan den Playa cu huurmento di Hotel Central, parkeo pa publico y caba cu huurmento di edificionan pa motibo di e edificionan bashi di gobierno. Esakinan tabata e problemanan pa soluciona y NO renobacion di Caya Betico Croes (Caya Grandi).

Tabata tin placa for di e prome dia di gobernacion na 2009, contrario na mentiranan di parti di AVP su mandatarionan.  E agenda scondi y e wega di move placa a cuminsa y tur na fabor di Friends & Family.

Tur cos a cambia pa motibo di a cuminsa cu e wasmachin di construccion, renobacion di Caya Betico Croes, di schoolnan, di camindanan, hospital etc etc. Contratistanan den e proyectonan tabata solamente hendenan liga na AVP. Nan ta e.o. Leoncita Arends, su rumannan y famianan, Mayon Arends y mas. E ultimo aki a traha semper na Toeristen bureau na Venezuela, awor diripiente door di AVP, e ta den construccion y makelaar den real estate.  Huur no a baha pero alcontrario a subi barbaramente. Na 2017 huur ta presupuesta segun contractnan cu gobierno na mas cu 23 miyon florin. AVP ta laga cera  schoolnan pa renobacion, ta huur un otro localidad pa e alumnonan cerca un friend y despues di mas cu 3 aña ta cuminsa cu renobacion. Tambe AVP no a traha e dos parkeergaragenan na Playa, cu apartamento ariba pa asina supuestamente trece bida bek den Oranjestad. Tur locual cu AVP a haci den construccion na Aruba NO ta trece ni un florin den caha di gobierno. En cambio tur placa a wordo gasta den seno di AVP mes y despues bay presta placa pa e pueblo paga. “Orguyosamente nos a crea e debe, un debe cu nos tur tin cu paga den futuro” tabata e palabranan di e propio Prome Minister di país Aruba. Esta un ofensa na e inteligencia di e pueblo di Aruba!

E di dos punto ta e echo cu AVP ta bay basha ex Bushiri hotel abao despues cu AVP a critica e gobierno anterior y a priminti di cu nan si por habri Bushiri hotel. Net un proyecto asina lo genera placa den caha di gobierno y tambe yuda crece economía di Aruba, anto esaki AVP ta demolisa.

Muy probable amigo di AVP, Marlon Garage ta bay haya e proyecto pa basha ex Bushiri hotel abao mescos cu el a haya Freezone na Oranjestad. Prioridad di AVP ta y ta keda solamente pa Friends & Family. E pueblo mes no ta bini ningun momento remarke pa haya algo, sino cu no ta solamente medida pa paga. Medidanan pa sacia e hamber pa poder y pa placa pa AVP. PM Eman definitivamente ta trata e pueblo di Aruba manera cu ta di “Buchi-Landia” e pueblo ta. Vota pa AVP ta mescos cu e pueblo comete suicidio.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio