ORANJESTAD, Aruba: Diaranson anochi na Mi Dudu Bar & Restaurant a tuma luga e rueda di prensa di Copa Noord 2017 y e aña aki SuperPlus softball team ta organisa e campeonato. Copa Noord ta un torneo cu ta existi pa hopi aña caba. Team Montaña Braves a organisa e prome Copa Noord. E torneo a sigui existi pa algun aña y despues a para pa basta aña largo. Sinembargo 20 aña pasa e team di Calabas Blue Jays a dicidi cu Noord no por keda sin su torneo y a cuminsa bek cu e torneo di Copa Noord. Cada aña un di e teamnan cu ta participa na e torneo ta haya oportunidad pa organisa e campeonato.
E aña aki e reto ta pa SuperPlus, pasobra nan tin di haci cu e torneo ta uno exitoso mirando cu ta celebra e di 20 aña consecutivo di Copa Noord. E torneo lo dura 6 siman largo ariba e fechanan: 30 di Juli, 6 – 13 – 20 – 26 – 27 di Augustus y e final lo ta dia 3 di September 2017.
P’esey SuperPlus conhuntamente cu Tropic Bottling Co. ta invita pueblo di Aruba y muy en special e pueblo di Noord pa yega na e apertura di Copa Noord cu lo tuma luga dia 30 di Juli 2017. Pa 10:00 di mainta lo tin e desfile di e teamnan participante acompaña pa Massive Brassband cu lo duna un show espectacular. Despues di e ceremonia oficial y tiramento di lot e weganan lo start pa 11:30 di mainta. Pa clausura e dia di apertura 8:00 di anochi e banda D’Licious lo deleita un y tur cu bon musica. Bar y cushina naturalmente lo ta bon surti.
Superplus softball team ta yama danki na tur nuebe team cu ta participa den e torneo cu ta Bad Boys, Calabas Blue Jays, Kudawecha Indians, Kudawecha Redskins, Mariners, Montaña Braves, Royal Power , Tanki Leendert Giants y SuperPlus y deseanan hopi exito cu e weganan. Nos ta gradici tur nos sponsornan: Brouwerij Nacional Balashi, PriceSmart, Banco di Caribe, Sr. Thode y Healing Hands Massage y Final Touch pa nan aporte na Copa Noord 2017.
No por keda sin gradici Debby y Chomon di Mi Dudu Bar & Restaurant pa permiti pa haci e rueda di prensa tuma luga na Mi Dudu.
E cerbes di Copa Noord 2017 naturalmente lo ta Chill y Balashi y durante e torneo lo tin un campaña espectacular: Pa cada compra di un caha di Chill lo ricibi un rugzak masha nice mes como regalo tanten cu tin den stock.
Superplus softball team ta invita tur fanatico di bon softball, pueblo di Aruba y muy en special e pueblo di Noord pa asisti na e weganan y aporta na e torneo cu ta priminti di bira un torneo di weganan na nivel y e ambiente na veld lo ta sigura. Masha danki y nos ta spera tur hende dia 30 di Juli 2017 pa 10:00 di mainta na Kudawecha Ballpark.