Home » Minister President y BoBario ta percura pa S.V. La Fama haya mini veld di futbol

Minister President y BoBario ta percura pa S.V. La Fama haya mini veld di futbol

by sxm
0 comment 65 views

ORANJESTAD – Prome Minister Mike Eman ta kere fuertemente den fomenta practica di deporte den cada bario. Durante e ultimo ocho añanan por a haya e Prome Minister frecuentemente di bishita na facilidadnan deportivo y combersando cu miembronan di directiva, cu mientras tanto, a bira su amigo. Esey ta e caso tambe cu SV La Fama cu siman pasa a realisa e groundbreaking pa nan mini veld di futbol cu yerba artificial.

Giovanny Croes, Tesorero y Team Manager di SV La Fama a expresa su satisfaccion y di henter e organisacion ora el a bisa cu pa nan ta un alegria y orguyo grandi. “Vision di gobierno ta cuadra cu e vision di La Fama y sigur lo trece un cambio y progreso den e mentalidad di deporte, pero tambe den e dushi bida den bario di Savaneta y bicindario. Nos ta kere cu un proyecto asina lo engrandece y mehora bida di nos tur akinan.”

Minister President Eman di su banda a duna di conoce cu, como Gobierno, nan ta hopi contento cu por duna e aporte aki na SV La Fama, un organisacion cu a demostra di ta dedica na duna oportunidad y un desaroyo positivo na nos hobennan. Eman a gradici directiva y miembronan pa nan cooperacion ya cu ta den union di forsa ta logra e resultadonan aki.

Adicional na esun di La Fama cu lo keda cla pa fin di augustus, tin cinco otro cancha den progreso den diferente bario. E siman anterior a inicia esun na Angochi y tambe tin un destina pa Centro di Bario Dakota, entre otro. E proyecto aki ta uno cu Gabinete Mike Eman tin algun tempo caba trahando riba dje, bou direccion di Ditto Acosta, pa logra financiamento atrabes di Comite Olimpico Arubano y tambe International Olympic Committe.

A scoge deliberadamente pa realisa e construccion durante dianan di vakantie pa asina ora cu scol cuminsa bek, y entrenamento hunto cune, e facilidad ta cla tambe pa tur e muchanan usa. “Nos ta hibando batting cages y soccer turfs den diferente bario y e siguiente stap lo ta pa tur veld bira di yerba,” Eman a bisa. “Esaki ta un practica den escala chikito.” Na final di e ceremonia na Savaneta, Croes a pidi Dios pa duna Minister President hopi bida y salud pa sigui traha pa pueblo y apoya deporte manera el a bin ta haci.

Sea ta cu un mini veld di futbol na Arsenal, sosteniendo deporte di kite y windsurfing of rehabilitando pista di Rough Riders na Savaneta, no tin duda cu Gabinete Mike Eman atrabes di e programa BoBario, tin e futuro di nos deportistanan y di deporte en general na pecho.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio