Home » ‘Vision 17 -21 Hunto Nos Por’ seccion di economia y labor POR den proximo gobernacion: Gradualmente lo cuminsa cera e gap entre salario minimo y e nivel minimo di subsistencia

‘Vision 17 -21 Hunto Nos Por’ seccion di economia y labor POR den proximo gobernacion: Gradualmente lo cuminsa cera e gap entre salario minimo y e nivel minimo di subsistencia

by sxm
0 comment 53 views

Partido Pueblo Orguyoso y Respeta (POR) recientemente a presenta su plan di gobernacion pa e proximo 4 añanan despues di a consulta esaki cu comunidad. E documento ‘Vision 17-21 Hunto Nos Por’ ta hopi amplio y ta mustra con POR lo soluciona retonan cu tin den nos comunidad. Den e articulo aki ta mustra con POR lo atende cu e retonan cu tin pa loke ta economia y labor.

Lo introduci un ley di Restauracion Economico (LRE; “Crisis- en herstelwet”) cual, entre otro, lo aumenta efectividad y eficiencia di servicionnan cu gobierno ta brinda na sector priva. Elimina “red tape”/ tardansa innecesario den proceso di otorgamento di diferente permiso (p.e. vestigingsverunning) y lo acelera procesonan di otorga tereno, bouwvergunning y aprobacion di plan di verkaveling. Cu un reforma fiscal, pa sector priva e cambionan den nos sistema fiscal lo nifica entre otro cu e “cost of doing business” lo disminui.

Trato y oportunidad igual

Garantisa trato igual na tur inversionista unda lo elimina nepotismo (fabor na namistad, lasonan familiar of politico) y asina evita bentaha inhusto;

Para e practica di duna beneficio desproporcional na inversionista di afo y percura cu tin condicionnan atractivo igual pa tur inversionista. Percura pa oportunidad igual pa participa na destaho publico pa proyecto y compra di producto y servicio. Promove entrepreneurship unda cu ta stimula mentalidad di entrepreneurship den nos comunidad. Brinda mas apoyo na inversionista local, tanto den conocemento (legal, fiscal, laboral, etc), como tambe pa yuda facilita acceso na capital den cooperacion cu stakeholders.

Promove sistemanan alternativo di financiamento (manera “venture capital”, “crowdfunding” y “microfinance”) pa asina facilita e proceso di mobilisa capital local pa financia inversionnan local. Percura pa empresanan estatal funciona na forma eficiente y efectivo, contribuyendo na nos economia. Introduci incentivonan fiscal (dividendo, loon-, inkomsten- en winstbelasting), stimula creacion di un fondo di inversion (un asina yama crowdfunding ) y brinda e infrastructura necesario pa desaroyo di un sector economico nobo enfocando riba companianan “high tech”, E-economy, startups, companianan fintech y otro actividadnan economico basa riba tecnologia nobo y innovativo. E meta ta pa tin mucho mas actividad tecnologico riba nos pais pa asina nos amplia nos diversificacion economico, como tambe percura pa mas eficiencia den procesonan existente. Lo concentra e desaroyo aki e.o. pariba di brug.

Turismo

Pa loke ta sector turistico, lo intensifica e maneho dirigi riba mehoracion di e calidad di e producto y servicio pa asina por atrae mas turista cu un poder di compra halto y ofrece productonan atractivo pa logra un aporte na nos economia mas halto.

Centro di ciudad

Duna impulso nobo na revitalizacion di centro di Oranjestad, creando mas posibilidad pa actividad di restaurant/café cu por haci uzo di acera publico y edificionan existente. Den consulta cu stakeholders lo formula y ehecuta un programa cu e meta pa aumenta e calidad di tur tienda y boutique, cu enfoke riba calidad di servicio, mercancia y edificio, pa asina nos por converti Caya Betico Croes den un “prime shopping street” pa nos localnan y bishitantenan. Ademas lo considera pa baha e Overdrachtbelasting pa propiedadnan den centro di Oranjestad y San Nicolas.

Reactiva e plan di Cultural & Heritage City di San Nicolas y promove establecimento di “upscale boutique hotels” pariba di brug.

Duna prioridad na desaroyo di “Medical Tourism”, introduciendo e leynan necesario y e condicionnan pa esaki ta atractivo pa esnan cu ta desea di inverti den e sector aki.

Lo introduci flexibilidad den e sistema di pensioen di AOV pa duna e ciudadano cu tin por lo menos 60 aña di edad e opcion pa e por, si e ta desea: Baha cu pensioen prome cu e cumpli 65 aña cobrando un pensioen un poco reduci; Traha part time te cu 65 aña cobrando un pensioen un poco reduci banda di su salario (“deeltijdpensioen”).

Lo aumenta e salario minimo pa compensa pa e efecto inflacionario di reforma fiscal y lo aplica un extra aumento pa asina gradualmente cuminsa cera e gap entre salario minimo y e nivel minimo di subsistencia (bestaansminimum).

Pa neutralisa e impacto di aumento di salario minimo riba e “cost of doing business” lo implementa un programa nacional dirigi riba aumento di productividad laboral. Tambe crea mas eficiencia y productividad atraves di flexibilisacion di nos leynal laboral.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio