ORANJESTAD, Aruba: E team di baseball Rockets Organization a batisa nan uniform nobo y a haci esaki conhuntamente cu nan sponsor di hopi aña Malta Balashi. Richard Giel, representante di Tropical Bottling Co. a basha malta riba e uniform pa asina batisa esaki. Muchanan hunto cu coachnan, directiva y mayornan tabata presente na e bautismo aki, unda cu tur tabata contento di mira con grandi e organisacion a bira. Rockets a duna Malta Balashi un gradicimento pe sosten cu nan ta ricibi. Richard Giel a ricibi e gradicimento aki, como cu nan no a spera di esaki.
Tropical Bottling Co. ta contento di sponsor e team 7 y a deposita confiansa grandi den Rockets. Representante Richard Giel di Tropical Bottling kier mira e teamnan den final, pero tambe ta honra pa sponsor nan. Directiva di Rockets ta contento cu Malta Balashi a sponsor 7 di nan 8 team
E sistema di farm di Rockets a cuminsa cu 5 team y durante añanan esaki a crece te cu awo tin 7 team cu ta cuminsa desde e edad 5-6, 7-8, 9-10, 11-12, 13-14, 15-16 y 17-18.
Vice presidente di Rockets Organization, Noralfa Eckmeyer, cu nan ta contento di tin un sponsor, pasobra e team ta consisti di casi 120 mucha. Tambe e organisacion ta consisti di 23 boluntario, coachnan, 7 miembro di directiva, pero tambe e mayornan cu ta contribui pa tin un team. Rockets Organization lo ta competiendo den e campeonato di ABBA, asina el a splica.
E organisacion di Rockets no tin solamente muchanan homber, pero tambe den 3 categoria tin mucha muhe cu tambe ta hunga cu nan. Pero asina cu nan yega na un edad di 13-14, nan no por sigui hunga baseball mas. ABBA a cambia e edad di liga y esaki lo ta U-6, U-8, U-10, U-12, U-14, U-16 y hubenil, cual ta pone cu muchanan chikito ta subi di categoria pero hopi di esunnan grandi ta baha di categoria. E cambio aki ta uno drastico pa nan, pero esey Rockets Organization ta cla pe campeonato aki.