Home » Partido POR: Enfoke di combersacionnan ta riba formacion di un gobierno cu ta crea stabilidad y confiansa den comunidad

Partido POR: Enfoke di combersacionnan ta riba formacion di un gobierno cu ta crea stabilidad y confiansa den comunidad

by sxm
0 comment 98 views

Dialuna merdia partido Pueblo Orguyoso y Respeta (POR) a reuni cu gobernador y informador pa asina continua cu e proceso cu ta encera e posibel formacion di un gobierno. Diferente puntonan a wordo treci dilanti cu ta encera e preocupacionnan di e situacion financiero di Pais Aruba, plan di gobernacion di partido, integridad y varios otro punto cu a wordo presenta na Gobernador siman pasa, lider di partido POR sr. Otmar Oduber ta splica.

Durante e encuentro a mira cu e puntonan cu POR a trece dilanti durante di e combersacion cu Gobernador siman pasa a wordo refleha bek den e tarea cu informador a haya. Den cuadro di e topico di e situacion financiero di Pais Aruba, a pone hopi atencion na e aspecto di ‘nulmeting’ cu mester por wordo haci. A haci peticion urgente pa por logra esaki, con lo dune forma y kendenan lo mester wordo envolvi. Bande di e aspecto financiero, por a mira cu varios parti di contenido di e plan di gobernacion di partido POR a wordo trata, manera e aspecto di integridad den gobernacion. Institutonan cu ta existi mester wordo reenforsa na un forma hopi severo, enfocando riba e parti di transparencia.

Locual cu tambe a wordo combersa hopi riba dje ta cu mester forma un gobierno cu ta sinta pa 4 aña. Un gobierno cu ta crea stabilidad, confiansa den comunidad. “Nos a mustra riba e echo cu nos kier ta un partido cu ta cana dilanti riba e creacion di confiansa den instituto politico na Aruba. Sr. Andin Bikker a trece na varios ocasion dilanti, e echo cu kier mira cambionan tuma luga den di Parlamento di Aruba pa loke ta reglamento di ordo y e forma cu ta hiba debate. Y cu ta duna Parlamento oportunidad berdadero pa haci nan trabou di controla gobierno den nomber di pueblo. Esakinan ta algun di e puntonan cu a resalta y cual a palabra cu diaranson awo lo bin bek hunto cu Informador cu algun informacion adicional cu nos lo manda pa nan,” sr. Oduber a bisa.

Concluyendo, lider di partido POR a enfatisa cu, e programa di MEP cu POR ta basta similar y ketobay ta riba mesun liñanan cu a combersa cu Gobernador siman pasa riba dje . Den e caso aki a mustra cu partido MEP tin un similaridad hopi grandi den e programa di partido y riba hopi tereno bo por mira cu nos ta ‘match’ y cu ta convivi cu otro riba e preocupacionnan cu tin den comunidad. Tabatin e prome encuestronan cu a tuma luga inoficial tambe entre e comisionnan cu a intercambia di pensamento di partido MEP y POR y ta kere cu ta den e direccion aki tincu sigui cana. “Na e momentonan aki nos sa cu tin diferencianan di pensamento, opinion y den programa pa loke ta partido RED, cual a papia riba esaki tambe cu Informador. Sinembargo, ta kere cu un base amplio semper mester keda un prioridad pa bo tin un gobernacion stabiel pa futuro.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio