Prioridad di partido POR na e momentonan aki ta pa trece solucion pa retonan indica como prioridad den comunidad

Den medionan di comunicacion tin diferente informacion cu ta wordo treci dilanti pa loke ta reparticion di carteranan pa e proximo gobierno. Lider di POR sr. Otmar Oduber a indica cu te ainda no a toca temanan pa loke ta trata carteranan  na e momentonan aki. Tin prioridadnan si,  y esakinan a wordo entrega den e documento cu a entrega na informador den cual a mustra  cu nos prioridadnan ta loke a identifica for di comunidad di Aruba y den esaki bo tin e aspecto di inseguridad cu ta biba na Aruba, aspecto economico cu ta encera creacion di un revolucion economico y posibilidadnan nobo pa esnan cu ta inverti na Aruba. Pero tambe pa percura cu nos mesun hendenan tin miho entrada a base di e costo di bida halto cu tin y trece solucion pa retonan di salubridad cu ta keda aspectonan importante, sr. Oduber a splica.

“Den e discusionnan ey unabes cu sinta na mesa y wordo dicidi cua ta e base cu ta bay forma e proximo coalicion, te na e momento ey e discusionnan lo inicia a base di un programa pa goberna. Den e proceso aki lo pone e diferente programanan hunto pa traha un solo programa hunto (general) pa bay wordo ehecuta den e proximo 4 añanan. A base di esey e ora ey mester bay dicidi con e reparticion di carteranan lo bay ta.” Si wak con reparticion a bay den historia, semper e reparticion ora cu tabatin partidonan di 9 asiento cu 2 asiento manera tabatin 9-1-1, tur a reparti a base di 5-2. Den e caso aki lo mester mira e ora si ta yama un partido adicional den e caso aki pa inclui partido RED pa amplia e base y hacie uno mas amplio manera cu sr. Gobernador a pidi, e ora ey lo tin un scenario nobo cu mester wordo papia riba dje.

Finalmente sr. Oduber a enfatisa cu no a yega na e punto di discusion ainda pa loke ta e reparticion aki, y den e caso aki e ta keda na e  partidonan cu ta bay forma gobierno pa bay wak con e prioridadnan den e programa ta y si mester amplia y yega na un coalicion  di 3. Lo mester mira kende ta esnan cu ta asumi e responsabilidad conforme di e programa y eynan lo reparti e carteranan conforme e prioridadnan di Aruba.