Amuay, Paraguana: Habitantenan di e comunidad di Amuay, ta denuncia e derrame di petroleo aki cu a bin di e centro di refinacion di Paraguana, e derrame a bay den e lama di e bahia, causando dañonan grandi na e medio ambiente, e flora y fauna. Varios pisca, parha y mata ta muriendo y esaki ta afectando tambe e economia local.
Varios mata, pisca y parha a muri
Nan a duna di conoce cu desde Diadomingo marduga e piscadornan a observa un mancha preto, cu a cuminsa cubri e lama di Amuay. Esaki a pone cu e habitantenan mesora a bati alarma y a cuminsa buska ayudo, pero no a haya oyido.
Segun e habitantenan un cantidad considerabel di pisca a wordo haya morto riba e beachnan y mescos varios especie di parha a wordo haya morto, esaki a consecuencia di e awa cu a keda contamina pa e derrame di petroleo.
Afectando e habitantenan economicamente
E situacion ta afectando e economia local, paso e piscadornan no por sali bay pisca pa mantene nan famia, paso e awanan ta contamina, esaki tin e piscadornan hopi precupa.
Aparentemente a dura tres dia pa autoridad di PDVSA haci nan inspeccion di e desaster causa pa e derrame, tambe cu autoridadnan local ta dunando e derrame aqui masha poco atencion.
Otro problema: no tin producion di awa y habitantenan ta precupa
Despues di basta aña cu e habitantenan di e comunidad di Amuay a logra haya un planta di Desalinisacion y awo cu nan mes ta produci awa via e planta aki. E planta den e dianan aki a para e operacion, debi na e contaminacion di e awa di lama causa pa e derrame di petroleo. E operacion di e planta lo keda para te dia cu e problema cu e derrame keda resolvi.
E habitantenan a wordo informa na diferente ocasion, cu lo dura tres siman of mas pa e trahadornan di saneamento ambiental hunto cu tur e equiponan technico y humano, limpia e derrame aki, pero e habitantenan ta teme cu e lo por bay dura mas cu tres siman.
PDVSA a manda un comunicado oficial
PDVSA a manda un comunicado oficial referente e problematica aki bisando cu ta debi na e awaceronan constant registra na e estadonan Zulia y Falcon, cu a produci e derrame y genera e mancha na e costa di e bahia di Amuay.
Como medidanan pa tipo di derrame asina, e centro di Refinacion di Paraguana ta activa mesora un plan di contigencia, den cual nan ta recolecta e petroleo cu un material cu ta absorva y vacium esaki, tambe nan ta pone barreranan special cu ta impidi e crudo di move y asina haci e area afecta mas liher cu ta posibel limpi.