ORANJESTAD, Aruba – Diabierna dia 20 di October, McDonald’s Aruba a celebra e Gran Dia 2017, unda tabatin e evento di recauda fondo pa Centro Man Na Obra. Cu cada compra di Big Mac di e dia aki a bay p’e centro cu e meta pa yuda promove training pa trabou y integracion den comunidad di e personanan desde 16 aña.
Riba e dia aki e 3 sucursal di McDonald’s na Aruba, hopi persona a yega y cumpra nan Big Mac pa yuda Centro Man Na Obra. E dia aki a conta cu presencia di e embahador Galloway Jr., kende tabata invita tur hende pa yega na un di e sucursalnan pa cumpra un Big Mac y asina tabata haci un donacion na Centro Man Na Obra. Galloway Jr. tabata yuda den cushina, pero tambe a sirbi clientenan na e “counter” y “drive thru”, unda hopi persona a keda sorprendi. E radio emisora Magic FM y Cool FM tambe tabata presente y hunto cu Galloway Jr. a anima y entretene tur hende cu tabata presente na McDonald’s Seroe Blanco.
Desde 6:00 te 8:00pm na cada sucursal tabatin un DJ cu a anima e atardi. E sucursal di Palm Beach a keda habri te 1:00am y e comunidad por a cumpra nan Big Mac ainda pa asina yuda e centro. No solamente hendenan tabata cumpra nan Big Mac, pero companianan a cumpra nan coupon delanta pa asina yuda na e causa importante aki.
Supervisor Operacional, Sulina Vrolijk: “Durante e dia nos a bende hopi Big Mac pa haci donacion na Centro Man Na Obra”. Elvira Tromp di Centro Man Na Obra y e muchanan di e scol tabata contento cu e yudansa cu nan a ricibi di McDonald’s y comunidad di Aruba. “Danki na McDonald’s p’e donacion y tur hende cu a cumpra Big Mac durante e Gran Dia. Cu e donacion aki nos por sigui traha riba training pa trabou pa nos studiantenan”, asina Elvira Tromp a indica.
Arcos Dorados ta e mayor frankicia di McDonald’s rond mundo den terminonan di benta den tur e sistema y den number di localnan. E compania ta e cadena di restaurantnan di fast food (“QSR”) mas grandi na Latino America y Caribe. Tin e derecho exclusivo di posee, opera y otorga frankicianan di localnan McDonald’s den 20 pais y teritorionan di Latino America y Caribe, incluyendo Argentina, Aruba, Brasil, Chile, Colombia, Costa Rica, Curaçao, Ecuador, Guyana Francesa, Guadalupe, Martinica, Mexico, Panama, Peru, Puerto Rico, St. Croix, St. Thomas, Trinidad y Tobago, Uruguay y Venezuela.
E compania ta opera of frankicia na mas di 2100 restaurant McDonald’s cu mas di 90.000 empleado y ta conoci como un di e miho empresanan pa traha na Latino America.
Arcos Dorados ta cotiza den e Bolsa di Balor di New York (NYSE: ARCO). Pa mas informacion riba e Compania, por fabor bishita e seccion di Inversionistanan di nos website: www.arcosdorados.com/ir.