Parlamentario Endy Croes a baha fuertemente riba parlamentario Michael Lampe di AVP dialuna mainta durante e conferencia di prensa. Manera Croes a splica na diferente ocasion cu ora bo mishi y troce palabra y gaña riba Lider di partido MEP y actual Ministro Presidente di Pais Aruba, no kere cu bo lo haya un “free ride”. Michael Lampe ta conoci como un politico di “peso pluma”, esta un politico di panlefi.
Un mudo papiando disparate
Den un articulo cu a sali publica dialuna 19 di maart 2018 Lampe ta splica cu Evelyn Wever Croes lo a informa pueblo cu gobierno no lo bay cumpli cu normanan di 2018 di acuerdo cu e ley di LAFT cual ta significa un aanwijzing, esta un KB y pues ta entrega asina nos autonomia. Ora un “mudo” papia disparate pa prome biaha nos mester responde poco bruto. Michael Lampe te cu awe no a hiba palabra den parlamento. Dia 20 di december 2017 a trata presupuesto supletorio, pa 13 ora largo y Michael no a hiba ni un palabra. Na final el a vota contra na momento cu coleganan a trapa riba su pia pa e realisa cu e mester vota. Nos ta conclui cu e articulo aki tampoco ta Michael “panlefi” a skirbi sino el a wordo skirbi p’e, pasobra Michael a demostra cu e no ta apto pa politica y su presencia ta un peso liviano y no ta contribui nada na e oposicion zwak y anticua cu AVP ta hibando. No obstante esaki nos ta respet’e pa su musica. Miho e keda dedica su mes na lesa “noot” y trece alegria pa pueblo y laga rapportnan politico pa esnan cu por lesa y compronde.
Subi avion y bay Hulanda
Minister Presidente a declara cu e lo bringa te ultimo rosea contra Hulanda pa evita un KB cual porcierto ta refleha ainda den e maneho desastroso di Mike Eman. Tambe Prome Ministro a splica cu e no lo bay den welga di hamber bou di un palo y tampoco lo yama Hulandesnan pa “verkrachters” manera lider di Michael Lampe, esta Mike Eman si a haci, pero lo subi avion y bay Hulanda pa busca solucion. MEP su posicion pa autonomia ta conoci y ta danki na MEP y Betico cu a lidera e lucha awe Aruba tin su Himno, su Bandera y su Status Aparte. Esey ta splica tur cos y sigur Evelyn su posicion. Just pa recorda Michael “Panlefi” cu Evelyn tin sanger di su tio esta di Betico ta core den su venanan y nunca por traiciona su Pais manera e famia Eman, kendenan si a bende Aruba 12-8 pa un posicion di minister.
KB nan contra gobierno di AVP
Den historia di politica AVP a haya un KB riba Husticia tempo di Watty Vos ( q.e.p.d) momento cu Henny Eman a pidi pa investiga Watty tras di su lomba. Esnan cu a yega di lesa rapport Koerten ta compronde esaki cla y raspa. Esaki tambe ta un traicion cual kisas no ta henter pueblo sa di dje. AVP bou di Mike Eman a haya un otro KB na 2014. Mike Eman mester a ricibi un otro KB (2) na final di september 2017 como cu e no a entrega presupuesto 2018 per 1 september 2017 manera ley LAFT ta stipula. Mike Eman y AVP mester a ricibi un di (3) KB momento cu nan no a cumpli cu e norma 2017 cual mester tabata un deficit di -0.5% di GDP. Finalmente e presupuesto 2018 ta trece cu ne -276 Miyon di deficit cual sigur no lo cumpli cu ley di LAFT, esta un surplus di 0.5%. Tur esaki CAFT a splica caba 3 di februari 2018 den nan reunion cu parlamentarionan y despues cu prensa di cual atrobe Michael Lampe tabata ausente. Pues no por compronde e parti aki den su articulo. Lampe a papia tambe di BBO di 3.5% pa 6%. Ta un berguensa pa Lampe papia di BBO mientras su partido a campaña na 2009 cu nan lo elimina BBO y na 2015 hustamente su partido a aumenta esaki cu 2% pa un total finalmente di 3.5%. Parlamentario Endy Croes ta finalisa bisando Lampe, “schoenmaker blijft bij je leest”. Pues no tenebo ocupa cu temanan cu bo no ta compronde ni tampoco domina.