Durante e ultimo tres lunanan cu a pasa, Colegio Filomena, Colegio Santa Famia, Mon Plaisir Basisschool, Puis X School y Prinses Amalia Basisschool a participa na e UNICEF ‘Kinderrechten Filmfestival’. E alumnonan a ricibi les tocante derecho di mucha, traha un pintura tocante derecho di mucha y despues a traha hunto cu un ‘filmcoach’ (CineAruba y Artmando) un pelicula tocante un derecho cu nan ta haya importante. Hunto cu e ‘filmcoach’ e alumnonan a scirbi un ‘script’. Despues di esaki e ‘filmcoach’ hunto cu e alumnonan a graba un pelicula. Den e pelicula e alumnonan mes ta e protagonistanan. E alumnonan a gusta esaki un mundo.
Ariba dia 26 di maart benidero lo tuma lugar e ‘première’. Durante e ‘première’ e alumnonan di e scolnan ariba menciona lo mira pa prome biaha nan pintura trasforma den un pelicula ariba e pantayanan grandi di Caribbean Cinemas. Na final lo saca un pelicula ganador cu lo participa na ‘Curacao International Filmfestival ’ contra e peliculanan di alumnonan di scolnan di Curacao, Sint Maarten, Bonaire, Saba y Sint Eustatius.
E UNICEF ‘Kinderrechten Filmfestival’ ta e festival di pelicula di mucha di mas grandi di Hulanda y ta ser organisa pa prome biaha na Aruba y Caribe. Cu e proyecto aki UNICEF Hulanda y Fundacion Telefon pa Hubentud Aruba kier siña e muchanan ariba un manera interactivo y creativo tocante nan derecho. E UNICEF ‘Kinderrechten Filmfestival’ ta ser patronisa pa CEDE Aruba.