Fuera di Augustus 1977, luna di maart tabata un di e lunanan di mas importante den e lucha di nos pueblo pa su libertad, su Status Aparte. Asina nos a conoce e fecha di 16 di maart 1976 (votacion pa nos himno y bandera), 18 di maart 1976 (inauguracion oficial di nos himno y bandera), 12 maart 1983 (acuerdo firma pa nos Status Aparte na e Conferencia di Mesa Rondo na Den Haag) y un fecha manera awe 41 aña pasa, esta 25 di maart 1977, caminda e prome Referendum consultativo a ser organiza den Reino Hulandes y esaki a tuma lugar na Aruba.
Vision di un gran lider
Nos tur por corda ainda e lucha tenaz cu a wordo hiba den añanan 70 pa nos lider inmortal Betico Croes, pa saca Aruba for di e constelacion Antiyano di 12-8. E pueblo Arubano semper a kere fielmente den Betico Croes y na varios ocasion esaki a ser manifesta den e eleccionnan prome cu 1977, esta cu nos partido MEP a ricibi mayoria absoluto, tanto den eleccion di Staten na 1973 como di Eilandsraad na 1975. Sinembargo e tempo ey nos opositornan politico constantemente tabata cuestiona cu si MEP di berdad tin e mandato pa realiza e causa di e pueblo Arubano. Den cuadro di esaki Gobierno Insular a duna diputado sr. Nelson Oduber e encargo di organisa un Referendum y p’asina e pueblo democraticamente por vocifera su mes riba e tereno di structura estatal.
Dos alternativa
Riba e stembiljet a aparece dos alternativa, esta 1. Vota pa mantene Aruba den un Federacion di 6 isla, of 2. Vota pa un Aruba Independiente. Ora cu Gobierno di Hulanda y di Antiyas a tende di e plan pa un Referendum, ambos gobierno a declara cu esaki no por, ya cu Statuut di Reino no ta duna espacio p’esaki. Sinembargo Betico Croes no tabata un politico di “Ja Baas”, pero a dal bay cu su plan visionario pa organiza e Referendum. A instala un comision consistiendo di president ` Carlos Bislip, Roy van Putten, Leo Yarzagaray, Albert Eman, Dominico Flemming, Godfried Eman, John Hart, Atan Lee y John van der Kuyp cu e tarea pa informa pueblo debidamente encuanto e referendum.
Boycot contra e referendum
“Vox Populi Vox Dei” tabata e lema usa durante e temporada di preparacion y campaña pa e Referendum. E referendum – bao supervision di varios observador for di exterior – a tuma lugar dia 25 di maart 1977 y pueblo den su mayoria di 82.5 % a vota pa e opcion di Independencia. Alavez no mester lubida cu Betico Croes como un verdadero social democrata a duna tur hoben di 18 aña cu a nace aki y cu no tabata Hulandes, pero si inscribi na Censo, e derecho pa vota. E tempo ey AVP a pidi nan hendenan pa keda cas (“Blijf thuis met Referendum”) y tambe a manda nan hendenan bay lama y tene barbecue pa no vota den e Referendum. Sinembargo e pueblo Arubano den un forma positivo a responde na e yamada pa Referendum. Cu e resultado aki Betico Croes y MEP a haya e mandato pa transmiti na tur instancia local y internacional e deseo di e pueblo Arubano pa su libertad. Gobierno Antiyano y di Hulanda a bagateliza e resultado di e Referendum y hunto cu AVP tabata yamele ilegal y sin ningun valor alguno. Hecho ta cu 30 aña despues tanto Hulanda y tur e islanan di Antiyas tambe a sigui e ehempel di Aruba y a tene diferente Referendum riba tereno di structura estatal y constitucion Europeo, mientras cu no tabata tin nada regla den nan constitucion. Asina pues e pueblo Arubano lo sigui recorda cu hopi aprecio y respet e Referendum di 25 di maart 1977 cu a wordo realisa danki na e vision y curashi di e gran estadista Libertador Betico Croes.