Nunca partido MEP a goberna pa pueblo, nunca gobierno di MEP a sirbi interes di pueblo y esaki ta otro realidad tristo ora cu analisa e reaccion ricibi di e comision di supervision financiero, esta CAFT, relaciona cu e plan di pakete di medida di Gabinete Wever Croes.
Un plan presenta siman pasa y anuncia pa Prome Minister Wever Croes, caminda un biaha mas ta sali bon cla dilanti, cu e ansha pa keda na poder pa sirbi amigo y famianan, ta mucho mas grandi cerca e prome mandatario cu realmente e kier sirbi e pueblo den su totalidad.
Lider di fraccion di AVP, sr Marlon Sneek ta mustra cu practicamente no tin otro conclusion pa saca ora cu analisa e reaccion ricibi for di CAFT prome cu fin di siman, caminda bon cla ta wordo mustra riba e plan diabolico hasta di Prome Minister, caminda ta sacrifica cartera di pueblo pa e por sigui den gobierno di e pais.
“Ora cu nos analisa e observacionnan cu CAFT a manda Parlamento pa loke ta e plan di maneho pa loke ta presupuesto 2018, ta resalta e hecho cu ta wordo bisa cu Gabinete Wever Croes na luga di baha su gastonan y trata di yega mas cerca di e normanan stipula pa presupuesto, CAFT ta enfatisa cu gobierno a presenta un plan di medida pero na mes momento ta duna Minister Otmar Oduber 20 miyon florin pa e por cumpli cu proyectonan su e tin pensa di bay ehecuta.
Aki ta bon pa mustra pueblo e observacion haci pa CAFT literalmente manera cu Parlamento a ricibi esaki y cu ta bisa:
“ De grootste kapitaalinvesteringen bedragen AWG 12 miljoen aan infrastructurele werken, AWG 10,5 miljoen aan projecten bij het ministerie van sociale zaken en AWG 6,7 miljoen voor andere projecten bij het ministerie van ruimtelijke ordening, infrastructuur en milieu”
Pues claramente aki Prome Minister ta confirma cu pueblo ta wordo castiga c’un aumento barbaro di 6% di BBO, pa simplemente acomoda un partner di gobernacion di partido MEP, cu ta POR, mustrando cu e ansha pa keda den poder di Evelyne Wever Croes ta riba interes di pueblo, riba interes di e pais caminda hasta nos por bisa cu e lider di MEP no tin problema pa Aruba haya un KB, contal cu e tene minister Oduber contento y asina e por tin gobierno.
Ya caba pueblo a tuma nota di e debilidad cu Premier Wever Croes tin pa Minister Oduber ora cu e mester a dobla di su posicion firme cu su gobierno lo tin solamente 7 minister pero ora cu el a wordo presiona pa e lider di POR cu a pone como condicion cu e tin cu haya dos minister, cos a cambia y awor ta mesun cos.
Claramente CAFT ta cuestiona e hecho cu e placa extra cu gobierno ta bay haya di e aumento di BBO, no ta pa cubri ningun gasto di ningun proyecto di PPP of cualkier otro excuus cu a wordo anuncia, pero ta pa duna Minister Otmar Oduber espacio pa e por bin cu proyectonan caminda e lo por saca probecha politico for di esakinan tambe.
E cos aki ta algo serio, e ta un abuso di marca mayor ora cu un Prome Minister ta dicidi di pone su interes politico y partidista prome cu interes di e pueblo cu e mester sirbi ya cu ta pueblo lo ta esun cu tin cu bay carga e peso grandi pa Evelyne tene Otmar Oduber contento pa asina e keda den gobierno y su persona sigui como Prome Minister.
Esaki no ta algo nobo pa nos, ya cu semper a wordo demostra cu pa Evelyne Wever Croes, interes persona, interes di famia y amigonan, ta bin na prome luga y pa pueblo mes, nada,” lider di fraccion di AVP, Marlon Sneek a declara.