Parke Nacional Arikok: Diamars mainta un biaha mas e trahadornan di Parke Nacional Arikok,a dicidi di pone trabou abou. Rene Bernabela lider sindical di Topa tabata presente y ela splica, cu e motibo pakiko e trahdornan a pone trabou abou, ta pa mustra nan desgusto pa locual ta e maneho cu e directiva di parke ta hibando na e momentonan aki. Segun e Lider sindical, e manera cu e directiva di e Parke ta operando, a pone cu e trahadornan a dicidi cu asina nan aki nan no por sigui.
Siman pasa nan a sinta cu Minister Otmar Oduber, kende a mustra cu e tin e atencion pa locual ta e problema di e trahadornan di Parke Arikok. Segun Rene Bernabela, e Minister a manda puntra e directiva di parke mas informacion di locual ta su inquietudnan, tur locual ela tende di parti di e dirigentenan sindical representando e trahadornan. Esaki no a wordo manda solamente na e directiva pero tambe na e shete managernan cu hunto cu e directiva ta encarga cu e forma di opera e Parke Nacional di Aruba. E trahadornan a pone enfasis riba con e directiva y managernan ta comunica y con nan ta trata cu e trahadornan.
E trahadornan no lo bolbe bek na pia di trabou of no lo traha manera mester ta, mientras tanto cu parti di gobierno, parti di Minister Otmar Oduber, no bin un solucion pa cu e directiva aki. E lider sindical a duna di conoce, cu nan ta na altura cu tin managernan cu no tin trahador cu ta cay bou di nan, cu ta cobrando un dineral, te hasta cu lo tin un cu ta inscribi na Hulanda y ta cobra salario na Aruba. Esakinan ta puntonan cual nan kier aclariacion riba nan y di parti sindicato lo keda pone pression, te ora yega haya un clarificacion. No ta exclui cu e accionnan di e trahadornan no lo por wordo intensiva.
E trahadornan kier pa e parke draai manera mester ta y no manera e directiva ta haciendo actualmente, cu no tin comunicacion y no tin un trato drechi pa cu e trahadornan di e Parke. Awor a yega e momento cu e hemchi a yena y cu e trahadornan no ta acepta esaki mas. E sindicato y e trahadornan, lo bay sinta na mesa pa evalua e siguiente pasonan cu lo mester wordo tuma, no ta exclui cu e accionnan lo sigui y cua strategia lo wordo usa. Un cos ta sigur no sa ta con hopi e directiva di e Parke por keda sin depende riba e parkrangersnan aki, un cos ta sigur cu e parke no por keda draai optimalmente sin e parkrangersnan. Aparentemente e directiva tin 1 anja y mey sinta y no kier a sinta cu e trahadornan.
Rene Bernabela a bisa bon cla, cu na momento cu e trahadornan pone trabou abou y sali pafo, e trahadornan ta den nan derecho pa sali protesta, no tin niun miembro di directiva cu por bisanan nada y si e directiva aki kier bin cu menasa of intimidacion, no ta exclui cu esaki lo bay escala, cu tur su consecuencia pa cu e directiva y tambe e 7 managernan.