Home » Vocero di delegacion di Aruba, Rocco Tjon durante IPKO na Hulanda: “Aruba ta enfrentando retonan financiero, retonan cu e situacion di Venezuela pero tambe retonan grandi riba tereno social”

Vocero di delegacion di Aruba, Rocco Tjon durante IPKO na Hulanda: “Aruba ta enfrentando retonan financiero, retonan cu e situacion di Venezuela pero tambe retonan grandi riba tereno social”

by Admin
0 comment 56 views

Den Haag – IPKO (Interparlementair Koninkrijksoverleg) a cuminsa na Hulanda. Entre 29 di mei pa 1 di juni 2018, e paisnan den Reino ta reuni riba diferente topico importante cu ta toca cada pais den Reino. E meta di e reunionnan aki ta pa como parlamentonan den Reino fiha un posicion y posiblemente yega na soluccionnan efectivo pa retonan comun. Sr. Rocco Tjon, lider di fraccion di MEP y vocero pa e delegacion di Aruba, a elabora awe mainta den e reunion na Hulanda riba e desaroyonan recien.

 

Sr. Tjon durante su discurso a splica cu e desaroyonan relevante pa Aruba awor aki den relacion cu Reino ta encera supervision financiero, desaroyonan actual di e situacion cu Venezuela y e “Geschillenregeling”. A argumenta cu pa surpasa e retonan menciona  ta necesario cu e paisnan den Reino a base di igualdad percura pa e necesidadnan mutuo di Reino y alabes duna e sosten necesario.

 

Aruba ta enfrentando y ta reconoce su retonan como isla chikito y semper tawata dispuesto pa acepta ayudo y sosten di Reino. Pero, e ayudo y sosten no por sali for di un base unilateral. Sr. Tjon durante su disertacion a argumenta cu un Reino fuerte ta significa ofrece miho sosten y duna otro como pais e espacio pa desaroyo teniendo na cuenta e situacion local riba tereno social, economico y financiero. Tambe, un Reino fuerte ta significa duna otro oportunidadnan y derechonan igual como pais.

 

Sr. Tjon ta splica cu Aruba ta enfrentando retonan financiero, retonan cu e situacion di Venezuela pero tambe retonan hopi grandi riba tereno social. E delegacion di Aruba recientemente a acerca e representantenan di Hulanda cu tabata riba e isla cu e pregunta di con nan ta mira e desaroyonan riba Aruba. E representantenan Hulandes, en corto, a conclui cu tin un presion social grandi riba e isla, su institucionnan y e comunidad. Pa motibo di e situacion financiero precario, e presion ta enorme.

 

Mirando e desaroyonan actual, Parlamento di Aruba ta tumando pasonan concreto pa mehora esaki. E ta di gran importancia cu e accionnan pa mehora e situacion financiero riba e isla no tin como consecuencia cu mas dolor ta ser causa na comunidad. E ciudadano di Aruba mester por a confia cu tur organo di supervision manera Parlamento y CAFT tawata tin e bienestar di pais y su pueblo na pecho y como prioridad.

Sr. Tjon a sigui splica cu control di finansas ta bay man den man cu prioridad corecto di maneho. Di e forma aki e problemanan social ta ricibi su atencion y ayudo debido y simultaneamente e economia di pais ta wordo stimula.

 

Por ultimo sr. Tjon den su discurso a referi na e echo cu tamaño di un pais no mag wordo mal usa den Reino ora ta trata na yega na solucionnan comun.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio