Nos a scapa un KB sin un huelga di hamber
Siman pasa, e Colegio di Supervision, CAFT tawata na Aruba y a reuni cu Gobierno di Aruba. Motibo principal di e reunion ta pa CAFT informa Gobierno cu despues di tur investigacion, Presupuesto 2018 ta cla y ta realistico. Esaki ta nifica cu Gobierno di Aruba a cumpli suficientemente cu tur recomendacion di CAFT.
Prome Minister Evelyn Wever-Croes ta duna di conoce cu awo cu Presupuesto 2018 ta cla, cualkier menasa cu tawata tin riba mesa, awo no ta existi mas.
“Esaki ta trece alegria pa nos. Gobierno di Aruba a traha duro pa Hulanda haya confiansa bek den nos. Gobierno di AVP a kibra tur palabracion cu nan a haci cu Gobierno Hulandes y esaki a pone cu Hulanda a perde confiansa den nos”.
Premier Wever-Croes a duna di conoce cu pa recobra e confiansa perdi aki a rekiri pasonan concreto y firme di Gobierno di Aruba. Gobierno a papia cu e berdad y lo no bay manipula cu cifras. Gobierno a mustra honestidad y determinacion pa soluciona e problemanan di pais Aruba pero riba propio forsa.
“Mi ta felicita y gradici no solamente Minister di Finansa Xiomara Ruiz-Maduro y su ekipo, sino tambe tur minister di Gabinete Wever-Croes kendenan a duna nan cooperacion mustrando semper e determinacion cu hunto nos lo atende e temanan aki pa asina nos por senea e situacion financiero di nos pais. Di e manera aki, nos a mustra con nos a scapa un KB sin bay na huelga di hamber” Prome Minister a expresa.