Dialuna atardi Minister di Turismo, Salubridad Publico y Deporte Sr. Dangui Oduber tawata tey presente na Playa Linda Beach Resort pa celebracion di nan 35 aniversario. Durante e ceremonia pa conmemora 35 anja di existencia e mandatario tabata tin e honor di por a hiba algun palabra den nomber di gobierno di Aruba.
E aniversario aki ta marca un dia historico den turismo di Aruba, unda por mira bek den pasado. Danki na e personanan cu tabata tin e vision desde e comienso y a kere den e importancia di turismo como un pilar economico. Danki na nan awe nos por bisa cu turismo ta un di nos logronan dimas grandi di pais Aruba.
Den comienso di aña 80 “The Playa Linda Development Company” a tuma encargo di e tempo ey Basiruti Hotel por a cuminsa tuma nota cu cosnan bon tabata na caminda. Cu e ayudo di un team local di individuonan y companianan manera Raymond Maduro di “The Sun Development Company”, Dan Oduber como e architecto y ALBO Aruba entre otro. Tur tabata crucial den construi Playa Linda cu awe ta un di e pionero y bon conoci den e turismo di Timeshare Resorts aki na Aruba y den región. Awe Playa Linda ta conta cu mas di 200 camber y nan ta ocupa pa mayoria bes. Danki na Playa linda su staff y personal cu semper a sa di brinda servicio di calidad halto, cu ta haci cu e turista ta keda escoge e hotel bek.
Loke ta haci cu e turista ta keda bolbe bek nos isla ta e esfuerso no solamente di e managment team, pero tur e empleyadonan. Minister Dangui Oduber a duna di conoce cu e ta sinti hopi agradicimento pa cu e esfuerso cu e famia di Playa Linda a haci pa turismo di Aruba y ta deseanan tur clase di exito pa futuro.
Finalizando minister Oduber a gradici tambe Sr Raymond Maduro y Sr Dan Oduber pa cu e vision cu nan
tin. Nan ta considera como pioneronan den nos turismo.