Parlamentario pa fraccion di AVP, sr Michael Lampe a mustra cu Partido AVP a organisa un cumbre cu a conoce un aporte masalmente y for di cual a sali un energia grandi d tur esunnan cu a asisti na e cumbre aki.
Sr Lampe a sigui mustra cu partido a haya hopi sosten di e hendenan di AVP, kendenan a asisti na e cumbra pero tambe di activistanan, diferente miembronan cu a forma parti di henter e parti organisatorio di e cumbre.
“Na momento cu bo ta organisa un cumbre asina aki, ta un momento importante pa mustra trabounan cu partido ta haciendo despues di eleccion caminda nos ta trahando duro riba diferente plataforma, cursonan, preparacionnan, cu ta duna forma na lidernan pa futuro, pero cu tambe ta duna forma na e vision fuerte di partido, cu ta keda scucha su hendenan, pa asina cada biaha partido para mas fuerte pa un vision berdadero y realistico pa bo pais.
Ta sigur cu e cumbre tabata un momanto hopi importante caminda nos por a scucha nos hendenan, nos por a haci diferente presentacion riba halanan di partido, pa loke ta trata HAC, e plataforma di hobennan profesional, fundacion Mito Croes, Fundacion Digna Lacle Herera, Parlamentarionan, tabatin un ‘keynote speaker’ for di Hulanda, kende ta lider di fraccion di CDA.
Diferente discurso cu a ser hiba pa diferente candidato di nos partido, mustrando asina tambe e base di formacion constante, di adapta constantemente na un vision fuerte, caminda partido AVP ta haci un compromiso di tur banda cu nos hendenan, en preparacion di esaki.
Dado momento nos por a wak tambe, cu tabata un momento hopi importante ayera, tabata e momento cu sr Mike Eman a subi scenario y a duna su compromiso cu Aruba y partido AVP, caminda e lo postula su mes atrobe pa bira lider di e partido pa e siguiente periodo.
Esaki claramente lo tin cu wordo consolida duranta di e proximo Congreso di AVP cu mester tuma luga e aña aki ainda, pero sin duda un bunita momento ora cu publico a pidi Mike Eman pa e sigui haci su trabou cu el a bin ta haciendo, pa sigui carta e partido y pa sigui cu su comprimiso cu pueblo di Aruba.
Di nos banda nos ta sumamente contento con e Cumbre aki a cana y e aporte cu tin eyfo, e energia cu tin pa cu esaki y mi ta kere cu esaki tabata un exito sumamente grandi y mi ta yama danki na tur hende pa nan aporte na e Cumbre aki, pa asiste y participa den e energia positivo di e Cumbre 2018 cu a tuma luga ,” Parlamentario Michael Lampe a declara.