London, Inglatera: Un piloto hulandes cu a wordo deteni na Inglatera pa motibo di traficacion di cocaina, awo lo mester bay paga 470.000 Euro pa e cocaina cu ela trafica y cu a keda confisca, esey ta loke corte na Londen a dicta den su sentencia.
E piloto John Buwalda di 54 aña procedente di Hilversum a keda deteni na Juni 2016. Ela bula cu un avioneta for di hulanda pa Rochester Airport na East London.
Den un Holiday Inn hotel cerca di e aeropuerto chikito aki, e piloto a entrega e droga na su complice Jan Polak di 61 aña. Despues cu ela caba di entrega e droga polisnan ingles a drenta den accion.
Un team di recherche tabata tin bista hopi tempo caba riba Jan Polak y prome cu Buwalda a aterisa cu e avioneta nan tabata wardando riba dje den e parkinglot, pero a laga Buwalda pasa e droga pa su complice Jan Polak pa nan por a drenta den accion, pa asina por a detene e piloto y su complice, ambos a wordo deteni como sospechoso.
John tabata den baño na momento cu ela keda deteni, sin carson ela wordo saca for di baño y hiba door di recherchenan, su complice Jan Polak a wordo deteni na momento cu e tabata canando pa bay na su auto. E 22 kilo di cocaina puro cu a wordo haya, a keda confisca.
Corte a impone castigo di prison di 23 aña pa e hulandes y e otro homber a haya 17 aña, ambos en coneccion cu e traficacion y posesion di droga. Pero awo e sentencia a cambia y corte na Londen a dicidi cu e piloto mester entrega su ganashi tambe cu ta wordo calcula den careda di 470.000 Euro. Corte a dune 3 luna di tempo pa paga esaki. Si acaso e no logra pa pague, su castigo lo aumenta cu 4 aña mas riba e 23 aña ya dicta y e debe di 470.000 Euro aki lo keda habri.