Sero Blanco – Diamars atardi laat pa mas o menos 6:30 p.m, polis a wordo manda cu urgencia Sero Blanco, poco mas panort di Bo Wah Supermarket.
Prome informe tawata papia di un accidente pisa.
Na yegada di polis nan ta constata cu tin 3 auto envolvi, y cu tin un cabayero di edad cu mester asistencia di ambulance.
Den un di e autonan tawata tin algun mucha tambe. A ser papia di tres mucha. Aparentemente nan lo a haya sla na cara, pero parse no tawata di e serio eynan. Agentenan a opta pa ambulance controla nan.
Mientrastanto dos ambulance tawata na caminda pa e accidente.
Con e accidente a sosode
E autonan envolvi ta Nissan, un Suzuki, y un Hyundai.
E Nissan Tiida tawata bayendo direccion Oranjestad, e chauffeur no a ripara cu e Suzuki a stop mey mey caminda pa bay bira.
Pero segun e chauffeur di e Nissan e luz di e brake di e Suzuki no tawata cendi, o sea e chauffeur di e Suzuki no tawata tin su pia ariba brake.
Yegando mas cerca e Nissan a ripara cu e luz di brake a cende, pero ya tawata laat y ta dal e Suzuki parti patras.
Debi na e impacto aki, e Suzuki a bay dilanti y tawata net momento cu e Hyundai ta yegando y aki ta caminda e Hyundai ta dal e parti dilanti y ta draai e Suzuki pone cara panort.
Pues e Suzuki a wordo gedal door di dos auto, na e sitio.
Na yegada di Ambulance Paramediconan a atende e personanan herida.
Tur tres auto a sufri basta daño material.