ORANJESTAD – Actualmente e cabesante di e Tean Special di Resfuerso di KIA y Brigada di Cacho(K9), sr.Dick van Leenen, ta na hermana isla Sint Maarten. E ta eynan den nomber di e Ministerio di Husticia di Aruba y riba invitacion di e Cuerpo Policial di Sint Maarten. N’e ocasion aki a invita tur conductor cu nan cacho di servicio pa evaluacion y consecuentemente certificacion pa un periodo di dos aña. E unidad di K9 na Sint Maarten ta traha hunto cu polis, aduana, y prison. Nan ta presta nan servicio riba un base amplio denter di e ramo hudicial, tanto n’e banda Hulandes como e banda Frances.
Banda di e control di calidad di e cachonan di servicio, ta entrena un grupo di cacho pa listra den e area di detecta placa. Ya ta algun tempo caba cu Aruba tin cachonan pa detecta placa y p’e motibo ey Sint Maarten a pidi Aruba pa cachonan pa detecta placa.
Ya ta 6 aña tin cooperacion entre e Team Special di Resfuerso di KIA y K9 di Aruba y e undidad Hudicial – K9 di Sint Maarten. Durante dicho periodo, aki na Aruba, a entrena y certifica varios conductor y nan cacho pa listra y cacho di vigilancia, procedente di Sint Maarten pa polis, aduana y prison. E undidad di ambos isla ta disfruta di e mesun calidad di prestigio y ta mutualmente intercambiabel.