ORANJESTAD, Aruba –22 november 2018: Center for Diseases Control CDC den e ultimo dianan ta mandando un alerta riba un brote di e bacteria E.coli cu a origina di e lechuga tipo Romano. Na Merca a raporta 32 caso di personanan cu a bira malo cu sacamento y diaree den estadonan mas ariba manera New York, Michigan, Winsconsin y California.
Departamento di Salud Publico di Aruba su servicio di Warenkeuring en Hygienne tambe a tuma nota di e alerta aki atravez di medionan di comunicacion, pero for di CDC mes nos como pais no a ricibi ningun aleta oficial. Esaki pasobra na Aruba nos lechuganan Romano den su gran mayoria ta wordo importa for di Colombia of Hulanda y tambe pasobra mayoria di nos productonan importa for di Merca ta procedente di estadonan mas abou manera Florida.
Na e momentonan aki no tin ningun indicacion cu na Aruba nos lo por encontra nos mes cu lechuga afecta cu e bacteria, pero nos servicionan ta keda monitoria y investiga e situacion na Aruba. Como e departamento responsabel pa salud publico di Aruba nos ta eherce nos trabou cu seriedad y continuamente nos ta monitor tur situacion cu por trece den peliger salud di nos comunidad.
Pa mas informacion por tuma contacto cu Departamento di Salud Publico na 5224200.