Durante rueda di prensa di Gobierno di Aruba, Minister Otmar Oduber encarga cu Desaroyo Teritorial, Infrastructura y Medio Ambiente a anuncia cu entrante prome di januari 2019, Parke Marino Aruba oficialmente ta keda introduci.
Durante di e ultimo lunanan a hiba combersacion cu diferente instancia y grupo di piscado den diferente bario, a base di e combersacionnan aki a añadi un di 4 area protegi desde prome di januari den e parke marino. E di 4 area ta esun for di Lagoen/cas di gobernador te na Punta Brabo, cu excepcion di e areanan cu tin actividad di crucero tumando luga. Minister a splica cu a tuma e decision aki a base di e casi 90% di peticionnan cu a drenta di piscadonan cu ta sinti cu den e area aki merece proteccion considerando e cantidad di reda tira y otro actividadnan, cu ta perhudica e cantidad di piscanan.
Importante pa menciona ta cu, den e plan di maneho cu lo keda cla den e prome kwartaal di otro aña lo indica locual cu mag den cada area protegi. E aspecto di maneho lo ta den man di Fundacion Parke Nacional Arikok (FPNA) cu lo ta encarga cu esaki. Na e momentonan aki ta finalisando e plan di maneho cu ta a base di input ricibi di e gran cantidad di piscadonan cu cual a reuni y scucha nan preocupacionnan y sugerencianan. For di cada rancho e piscadonan a apunta un representante cu a yuda cu registracion di e sugerencianan aki pa por a inventarisa esakinan. Otro stakeholders tambe a yuda den e proceso pa yega na un plan di maneho, manera esnan di Turtugaruba y Aruba Birdlife Conservation. E plan di maneho mester ta cla prom cu 1 di maart 2019, pa e wordo aproba y pa cera e contract di maneho cu FPNA. Finalmente Minister Oduber a enfatisa cu ta importante pa comunidad ta bon informa di e proceso habri y transparente encamina pa loke ta proteccion di nos bida marino. Por subi e pagina di Facebook di Parke Marino Aruba unda cu regularmente ta publica informacion di e procesonan andando y e importancia.