Palm Beach: Diabierna anochi ta sosode un accidente cu un persona herida y hopi daño material, na altura di e crusada di Palm Beach, unda pa varios siman caba e lusnan di trafico no ta den funcion. Mesora a pidi pa presencia di polis y ambulance.
Diabierna a sosode dos accident riba e crusada peligroso aki, cu ta un crusada hopi trafica. Mas trempan den oranan di atardi tabata tin un accident pero no di e seriedad manera esun cu a sosode den oranan di anochi.
Na yegada polis nan ta bin compronde cu un Suzuki Vitara tabata biniendo di panort y di pariba tabata biniendo un Hyundai Getz, cu no a duna e Suzuki Vitara preferencia y a sali su dilanti. E impacto tabata hopi fuerte, cu e Hyundai Getz a bay dal contra un palo di lus, e Suzuki Vitara a keda pega contra e Hyundai Getz.
Aparentemente tabata tin dos persona den e Hyundai Getz, un persona a keda herida y e otro a bandona e sitio prome cu polis a yega na e sitio.
Personal di Ambulance a trata e herido y takelwagen a wordo pidi pa hala e dos autonan for di riba e caminda. Presencia di Elmar tambe a wordo pidi na e sitio pa controla e palo di lus.
E crusada aki ta hopi peligroso ora e lusnan di trafico no ta funcionando, automobilistanan mester pone extra atencion na momento di yega na e crusada aki, paso desde cu nan no ta den funcion constantemente tin boksmento na e crusada aki.