Diadomingo mainta Prome Minister di nos Pais a ricibi Prins y Pancho di Carnaval 65 na Bestuurskantoor na unda el a efectua e “Traspaso di Mando” na Prins cu Pancho pa e temporada di Carnaval.
Prins Bon y Pancho Malo a lesa e decreto di e maneho cu nan lo desea di hiba y a haya ful atencion di nos Prome Minister Evelyn Wever-Croes kende a felicita nan y a desea nan exito den nan tarea pa guia paradanan di Carnaval 65.
Dilanti di e mahestadnan di Carnaval 65 presente, representantenan di SMAC y e publico carnavalesco, e prome mandatario a duna un discurso pa desea Aruba henter un dushi temporada di Carnaval y a gradici tur esnan cu ta tuma nan tempo pa engrandece e fiesta cultural di mas grandi di nos pais. Den su discurso, Prome Minister a enfatisa pa nos tur como un comunidad enfoca riba e “Aña di Famia y di Cuido di nos Muchanan”, y pa e temporada di Carnaval nos pone e muchanan central. Cuida e mucha di demasiado sonido y solo, y ban permiti nan gosa nan fiesta sanamente.
Como un toke special di e dia aki, Prome Minister a regala nos mahestadnan di Carnaval 65 un bunita pin pa asina nan tambe por keda cu un bunita recuerdo di nan bishita.
Aruba, ban goza di nos Carnaval na un manera sano.