Parke Arikok/ Conchi natural pool
Diamars den oranan di merdia un caso sumamente lamentabel a sosode na e pool natural yama Conchi. Un Tour Guide yama Jermaine Rasmijn aparentemente lo a drenta lama, pa por a yuda un turista esey ta un version.
E otro version ta cu e Rasmijn lo tawata na rand di baranca y pa un of otro motibo a bay awa.
Esey tawata momento cu alarma a wordo bati, y mesora Park Rangers nan a wordo avisa y asina a sigui avisa demas unidadnan di rescate.
Lamentablemente Jermaine no a sobrevivi e lama bruto cu tin eynan.
E victima tawata traha cu Around Aruba Tours y ta laga su pareha y nan yiunan atras. Un persona semper alegre nos a compronde.
For di Cuerpo Policial nos a siguiente informe:
“Awe diamars pa 12:30 di merdia alarm central ta notifica central di polis di un caso cu un persona lo mester a haya problema den lama na Conchi. Polis a jega na e sitio hunto cu personal di Arikok. E lugar di e sucedido ta jama Moro. Por a compronde di e turistanan na e sitio cu ta trata di un tourguide cu a haya problema den awa.. Personal di brandweer a presenta mirando e situacion y asina purba juda pa sake.
Polis conhuntanente cu Brandweer a logra despues di hopi rato pa saca e curpa sin bida .
Ambulance no por a haci nada mirando con hopi e persona a keda den awa .
Pa 2:45 pm dr Texier a constata morto di J.J.R naci na Aruba dia 8 oktobet 1991.
Slachtofferhulp a presenta pa asina guia e famia den e momento dificil aki di e fayecido. E turistanan tambe lo haya judansa di slachtofferhulp mirando cu nan a keda den shock pa loke a pasa.
Cuerpo Policial Aruba ta manda palabra di condolencia na famia di e fayecido”.
Di parti nos Arubanative.com nos kier a desea famia di Jermaine hopi forsa den e dianan dilanti.