Kudawecha – Diaranson anochi algo prome cu 9’or un brommer ta dal un peaton, momento cu ela sali di luga pa crusa caminda.
Ariba e brommer tawata tin dos persona, probablemente tawata trata di dos hoben. Segun nos a compronde nan lo a baha for di e brommer un rato posiblemente pa mira kiko ta kiko, pero despues ambos a subi e brommer bandona e sitio.
Ambulance a ser yama y na yegada mesora a cuminsa trata e homber, cu tawata ariba caminda benta.
Polis di trafico a yega y ta logra haya algun parti di e brommer cu a keda atras. No ta conoci si a logra mira e number di e brommer, esta si e tawata tin.
Esaki ta bira e di dos peaton cu ta bira victima di hit and run. E prome tawata diadomingo anochi despues di Parada di Oranjestad, unda un persona iresponsabel ta dal un señora di 82 aña lagando e seriamente herida benta ariba caminda di Tanki Flip.