E prome dia nos a sali bay Leeuwarden pa cera conoci di cerca cu FIER, su establecimento y nan forma di traha contra agresion y abuso den relacionnan di pareha y/of familiar. FIER ta yuda homber y muhe, grandi y chikito. E mandatario ta explorando un acuerdo di cooperacion cu FIER pa nos por aplica nan experiencia y experticio na Aruba, adicionalmente na e cooperacionnan existente.
Manera ta conoci UNICEF ta un partner importante den nos Crisisplan Social, apoyando e sector social totalmente cu nan experticio. Recientemente e prome raportahe a tuma luga. Pa e ocasion aki UNICEF a bin Aruba y tabata activo den e raportahe. A base di esaki, riba diabierna, UNICEF a presenta algun recomendacion na Gobierno con pa haci e avancenan cu ya a logra, duradero y sostenible.
Riba diasabra Minister Glenbert Croes a bay Haelen cu ta keda cerca di Roermond pa bishita 3 soeur cu a traha na Aruba pa decadanan largo. Den cuadro di e crisis social nacional, mas bo ta realiza y aprecia tur locual cu den nan tempo a haci pa Aruba su mucha- y hobennan. Minister, den nomber di Gobierno y Pueblo di Aruba, a bisa nan danki.
Diadomingo e mandatario a haci acto di presencia na Dia di Aruba, na Hulanda. A pasa saluda tur nos hendenan personalmente.
Su dialuna mainta Minister Glenbert Croes a reuni cu Instituto Hulandes pa Hobennan esta Nederlands Jeugdinstituut. Un instituto cu ta forma parti di e opvoedcommissie instala pa Reino, cu tin como meta educacion di mucha den su bida diario.
Pa dialuna merdia e mandatario a reuni a sali bay Rotterdam pa reuni cu e team di Nationaal Programma Rotterdam Zuid. E parti aki di e ciudad a keda hopi atras den su desaroyo humano como tambe infrastructural, compara cu resto di Rotterdam. Glenbert Croes a haya un presentacion di kico tur a logra den 7 aña desde cu e programma aki ta den accion.
Diamars a reuni cu su homologo Hulandes Minister Wouter Koolmees. Hulanda y Aruba a firma un acuerdo unda cu lo coopera cu otro pa sigura cu cada ciudadano cu ta riba asistencia social, ta haya locual cu realmente e tin derecho riba dje.
Riba su ultimo dia na Hulanda, Minister Glenbert Croes, a reuni cu famia di Mitch Henriquez (qepd), e fayecido Arubiano a causa di agresion fisico di algun agente policial na Hulanda. Dialuna awor e caso ta continua dilanti mesa berde.
Esaki pues ta e resumen di dia pa dia, di e biahe di trabou di Minister Glenbert Croes. Un biahe fructifero for di cual lo sali avancenan grandi pa e sector social aki na Aruba sigurando exito di e Crisisplan Social.