Apesar di bo responsabilidad profesional e amor y dedicacion di un Mama no ta cambia
ORANJESTAD – Relaciona cu Celebracion di Dia di Mama e aña aki nos planta di Television Nacional TeleAruba a prepara un programa special dedica na nos mamanan yama Mama365.
E programa ta un produccion cu ta pasa den e seccion di Telenoticia y ya pueblo por a disfruta di varios edicion caminda a siña conoce mas di nos mamanan aki na Aruba den nan rol como mama banda di nan responsabilidad profesional y den famia.
Den e edicion di diabierna 10 di mei 2019, Mama365 lo enfoca riba e Mama Politico y Minister di Finansa, Asuntonan Economico y Cultura Sra. mr. Xiomara Ruiz-Maduro a wordo invita pa comparti su experiencia como un Mama cu ta eherce un trabou den e mundo politico na Aruba.
Den e programa aki nos ta sera conoci mas cu Minister Xiomara como mama cu apesar di ta carga un responsabilidad grandi como mandatario di nos pais, ta asumi su responsabilidad como mama cu hopi amor, dedicacion y gratitud na Dios di por ta mama di un yui homber di 12 aña.
Un invitacion special ta bay na pueblo di Aruba pa sintonisa e produccion special aki den Telenoticia di diabierna awor dia 10 di mei, net dos dia promer cu Dia di Mama.
Minister Xiomara Ruiz-Maduro ta haci uso di e oportunidad pa desea tur Mama y tur esnan cu tin e rol di Mama den comunidad, un felis dia yena cu bendicion, salud y amor.
FINAL
20190509