Home » Proyecto IMAX Cinema Eagle a drenta fase nobo di construccion

Proyecto IMAX Cinema Eagle a drenta fase nobo di construccion

by Admin
0 comment 53 views

 

 

ORANJESTAD, Aruba –  E ultimo dianan aki, automobilistanan a nota trabounan intenso tumando luga na e proyecto di IMAX Cinema Eagle situa riba Sasakiweg. Trucknan di ATCO for di marduga caba a cuminsa basha 800 m3 di concret pa e vloer di e edificio. E fundeshi ta basha caba, pues awor e construccion a drenta un fase nobo cu lo acelera e trabounan.

 

Cada truck di concret ta carga 8 m3 pues ta 100 truck a core bay bin na e proyecto pa asina garantisa entrega di concret fresco pa prepara e vloer fuerte pa sostene e edificio grandi pa acomoda e salanan di cine y compleho di restaurantnan.

 

Den e siguiente dianan lo nota cu pocopoco ta cuminsa arma e structura di hero pa duna e edificio forma. Di e forma aki lo construi e compleho di pelicula mas moderno y mas grandi den nos region, cu lo conta cu e tecnologia mas nobo di IMAX, cu ta promove e calidad di pelicula y zonido di mas perfecto na mundo. E tecnologia IMAX ta laga e amante di pelicula sinti cu e acontecimientonan ta tumando luga su dilanti, pa e calidad increibel di imagen y zonido.

 

Construccion a start di aña pasa

Na october 2018 a rosa e tereno pa construi un edificio di piso, cu ta midi mas di 6500 meter cuadra den Caya Dr. J.E.M. Arends # 8 na Eagle, bisto for di riba Sasakiweg. MetaCorp a yega na un acuerdo cu e compania BOHAMA pa basha e fundeshi te vloer, mientras cu Quick Electrical ta encarga cu aspectonan di coriente y CHS ta encarga cu plumbing, mientras cu e structura di hero ta prefabrica na Hulanda y arma na Aruba. Henter e trabou ta bou supervision di HJC Engineering. Na tur e proyecto aki ta un inversion di 33 miyon florin.

 

Inversion creando cupo di trabou

E proyecto di construccion lo caba den e prome kwartaal di aña 2020. Mirando e trabounan andando, e proyecto IMAX Cinema na Eagle ta creando riba 75 cupo di trabou directo y mas cu esey ainda den forma indirecto. Ora e proyecto ta cla, atrobe e lo crea cupo di trabou adicional na mas di 50 trahado den henter e compleho di entretenimiento.

 

Tocante IMAX Cinema Eagle

IMAX Cinema na Eagle lo consisti di 7 sala normal, mas 2 sala adicional VIP, cu ta bin cu balcon y riba dje 1 sala mas IMAX, pues na tur lo tin 10 sala disponibel pa publico. Obviamente esaki lo bira e compleho di pelicula mas moderno y grandi di nos isla y den henter e region aki. Fuera di salanan di pelicula, IMAX Cinema Eagle lo conta cu 7 espacio pa restaurant na e parti mas abou di e edificio. De facto, publico lo tin hopi opcion ora yega eynan.

 

Pa facilita bishitantenan, IMAX Cinema na Eagle lo tin 300 espacio di parkeer gratis! Es mas, clientenan pa salanan VIP lo tin parkeerplaats special, prereserva, di cual ta yega parkeer y haya acceso mesora na e sala y pa cuminsa disfruta di nan pelicula y tur otro beneficio cu un berdadero servicio VIP ta encera.

 

E prome negoshi di MetaCorp tabata cine

 

Ta for di aña 1920 cu a cuminsa cu e negoshi di cine, E. de Veer Chain Theatres, e tempo ey tabata den e cura di unda awendia ta Censo y Registro Civil. Na aña 1929 a habri Teatro Gloria entre Nassaustraat y Steenweg na Playa. Na San Nicolas a habri Royal, cu despues a haya e nomber di Teatro Principal y tambe teatro Cinelandia. Asina a sigui desaroya mas teatronan, manera Teatro Savaneta, Aurora na Santa Cruz, Rialto den Steenweg. Den temponan mas moderno nos a conoce Boulevard Theatre y sin lubida Drive Inn Theatre. Na dado momento e compania tabata maneha 9 diferente teatro tur rond di Aruba.

 

Na caminda pa 100 aña!

 

Den cuadro cu celebracion di 100 aña di existencia, MetaCorp a anuncia varios actividad y inversion, manera e proyecto di Cinema IMAX na Eagle, remodelacion completo di The Cinema na Renaissance y reapertura di Teatro Principal na San Nicolas cual sigur ta algo di celebra. Di e forma aki MetaCorp ta demostra cu nan ta kere den San Nicolas y ta sigur pa sigui inverti den desaroyo continuo di Pais Aruba.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio