Palm Beach, Noord: Diahuebs algo despues di 11’or di anochi, presencia di polis ta wordo pidi cu urgencia na un cas, pa un caso serio di menasa.
Na momento cu e patruya di Noord a yega na e cas, nan ta topa cu e tata pero e yiu homber, kende a menasa su tata, ya no tabata mas na e cas mas, ela bandona e cas na pia. Mesora polis a cuminsa cu un buskeda den vecindario pero no a logra topa cune.
Despues di un rato, e yiu homber a regresa na e cas, mesora a bolbe pidi pa presencia di polis, ora polis a bay bek na e cas, e yiu homber a nota presencia di polis y ela cuminsa core pa e polisnan, mesora a pidi pa presencia di mas patruya.
Varios patruya a yega na e sitio y no mucho leu di su cas nan a logra pone man riba dje. E tabata scondi banda di un cashi coriente di King David Suites. E patruyanan na e sitio a blokea e area unda e agressor tabata scondi y cu asina e no tabata tin mas caminda pa huy. Nan a logra detene y cu transportwagen di polis ela wordo hiba Warda di Polis na Shaba.