Dr Horacio E. Oduber Hospital – Diahuebs atardi Hospital a bati alarma momento cu na e prome piso banda panort a cuminsa sali of drenta huma, indicando cu tin candela.
Esaki a causa cu mesora a avisa 911, cu a saca dos unidad di Brandweer pa e Hospital.
Na prome instante tawata tin un confusion basta grandi, door cu a bay Hospital bieu. Esta esun den Caya Ing Roland H. Laclè.
E bruhacion tawata cu a bisa tin candela na Hospital bieu, pero loke nan tawata kiermen ta cu tin candela na e parti bieu di e Hospital Dr Horacio E. Oduber, o sea e parti dilanti cu nan ta considera bieu.
Despues cu a haya sa e localidad exacto por a mira tanto Brandweer y Polis bayendo direccion Ponton bek cu velocidad halto.
Esaki a costanan minuutnan valioso pa a yega unda si tawata tin candela.
Danki Dios cu no tawata algo grandi manera un uitslaande brand, sino esaki por a bira devastador.
Na yegada mesora Brandweer a wordo mustra unda e candela tawata. Segun nos a compronde durante trabounan di renovacion y usando cierto tecnica pa isola dak na e parti full panort di piso 1 algo a bay robes. Pues den e dak esaki a cende un candela.
E candela of huma a cuminsa drenta den 2 camber di piso 1 parti panort. Mesora personal di Hospital a evacua e area completo. Pesey por a mira na e entrada di e Hospital pashentnan sinta cu mask na cara.
Bomberonan hunto cu contratista tawata controla e area pa ta sigur cu no tin candela mas.
E cambernan tur bentana a wordo habri pa asina biento saca e holor y huma cu por tawata tin.
No sa si Hospital lo hinca e pashentnan bek diahuebs den e cambernan.
Niun persona a resulta herida.