Home » Curtis Fraser (POR): ‘Esaki ta e tempo pa San Nicolas lanta para y briya manera un ciudad exitoso na Aruba’

Curtis Fraser (POR): ‘Esaki ta e tempo pa San Nicolas lanta para y briya manera un ciudad exitoso na Aruba’

by Admin
0 comment 59 views

ORANJESTAD – Manera conoci, San Nicolas a caba di haya su mesun Cinema bou e nomber di The Cinemas @Principal, cual ta un otro paso positivo den e direccion corecto. Awor tin un carta tambe cu a sali pa propetarionan di e edificio na final di Caya na San Nicolas unda cu a duna nan 30 dia pa sinta cu gobierno y regla nan asuntonan. Gobierno ta tuma su rol di facilita un landscape na unda inversionistanan kier inverti Pariba hopi na serio segun Curtis Fraser di Fraccion POR ta expresa. 

 

Ademas cu traha duro pa atrae inversionistanan pa asina crea e di dos capital di Aruba, sr. Fraser ta enfatisa cu: “nos tambe ta haci locual ta necesario di nos parti pa drecha e aparencia pa asina haci Pariba mas atractivo sin perde su autenticidad.” Sr. Curtis kier trece pa dilanti cu esaki no ta trata di ningun menasa pa esunnan encarga cu e edificio bandona na final di Caya di San Nicolas – cual tin hopi aña den ruina – mas bien e ta un invitacion pa sinta cu gobierno pa dialoga y pensa con pa resolve e problema aki mas pronto cu ta posibel. “Tin algun violacion cu a wordo cometi y gobierno tin e poder legal pa haci hopi, sinembargo nos ta traha hunto cu e hendenan cu nos ta representa pa yega na solucionnan cu lo ta win-win pa ambos banda”, sr. Fraser ta comenta.

Un ciudad cu por para riba su mes economicamente
Sr. Fraser ta splica cu nan tin un plan na unda nan kier traha San Nicolas manera e di dos capital di Aruba. A cuminsa esaki cu e gobierno anterior (Cultural & Heritage City) anto esey ta e vision y soño, pa crea un ciudad cu por para riba su mes economicamente. Pa haci esaki, sr. Fraser ta subraya cu di berdad e ciudad mester sinti manera un luga exitoso cu menos bista mahos di edificionan bandona. “Hopi skina ora bo mira Pariba bo ta wak structuranan bandona of den estado deplorabel, nos no por permiti esaki mas. P’esey te hasta cu InfrAruba nos ministerio ta enfoca ariba ruina ariba caminda turistico/of camindanan cu turista mastanto ta tuma. “Nos ta bay haci e ciudad aki bunita y e ta bay bira e di dos capital di Aruba cu ta bale la pena pa turistanan bin Pariba y gasta nan placa.” Sr. Fraser ta splica tambe cu den e forma aki tambe nos lo duna inversionistanan y entrepreneurs e motivacion pa inverti Pariba, pa sinti e confiansa di e mercado y apoyo di gobierno pa facilita un ‘safe investment environment.’

“Ta importante tambe pa duna elogio na Minister Otmar Oduber cu a mustra consistencia den su apoyo pa un San Nicolas como di dos capital. E carta cu a sali ta conta cu apoyo di minister tambe, y ora mi a hiba e varios ruina di Pariba na su atencion, esaki ta cosnan cu e mandatario a bisa di ta bay haci un punto di dje. Pasobra San Nicolas mester yega na e meta y vision cu nos tin p’e, asina nos por haci nos parti pa hunto cu pueblo hib’e unda e mester bay”, sr. Fraser ta bisa.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio