Durante BarioFest na Brazil diadomingo ultimo, den nomber di Gobierno di Aruba y Minister Glenbert Croes, Pome Minister Evelyn Wever-Croes a entrega reconocemento na 5 baluarte di Brazil: Angelo Richardson, Giandrick van den Berg, Luis Inario Maduro, Heintje Ras y Vicente Ras. Cada nominado a resalta den diferente area. Prome Minister, tur dia den e siman aki lo elabora riba un nomidado siguiendo awe cu Luis Inario Maduro.
Luis Inario Maduro tawata un futbolista hopi dedica na e deporte. Pero su amor grandi pa e bario di Brazil y e muchanan y hobennan den bario, tawata impulsa señor Luis pa dedica su tempo pa mehora e bario y yuda nos muchanan pa nan por practica deporte y keda riba e bon caminda. Den añanan 70, señor Luis a logra un Veld di Softball na Brazil, ‘Detroit Ball Park’ pa yuda muchanan di bario hunga softball y baseball. Riba cua veld, Sint Michael School tabata uza pa haci sport y hopi campionatonan nacional y internacional a tuma luga.
Tambe riba e tereno di musica, señor Luis a destaca y a hiba e alegria di musica den e bario di Brazil. Den aña 50, el a yuda funda ‘Conhunto Los Bigotes’. Un cantante di Dande di su propio grupo cu tawata pasa canta den bario di Brazil. No solamente señor Luis tawata bon tocado di tambu, pero tambe tawata rekdo di cuero tambe y ta traha su mesun tambu. Tambe el a traha un caha di orgel y tocando wiri, e tawata compaña señor Cornes Noguera cu su caha di orgel Victoria na diferente fiesta den Brazil.
Banda di musico, Señor Luis tawata Barbero y doño di su mesun barberia na unda cu e tawata pela mucha y hende grandi na un prijs hopi abou mes, casi pornada. E tawata pela esnan malo te na nan cas.
Siendo tambe un hopi bon metsla, señor Luis a yuda hopi hende di e bario di Brazil cu diferente trabou cobrando un prijs hopi barata pa su trabou.
Esaki ta di 4 Bariofest cu ta wordo organisa pa Special Projects y ta resorta directamente bou di Ministerio di Asuntonan Social. Pa e ocacion aki, Special Projects ta duna oportunidad na pueblo pa nomina baluartenan, personanan cu a resalta den comunidad. Y durante Bariofest, e personanan aki ta wordo reconoci. Señor Luis Inario Maduro ta un habitante cu a stima di curason su Bario di Brazil y ta pa e motibo aki tambe, pueblo di Brazil a nomine como un baluarte.
Den nomber di Gobierno di Aruba y Minister Glenbert Croes, Prome Minister a felicita Señor Luis Inario Maduro cu su nominacion y a gradici Señor Luis pa su trabounan pa bario di Brazil y pa Aruba en general.