Tanki Leendert – Diamars mainta algo pasa di 7’or informacion a drenta di un accidente serio altura di Misa di Tanki Leendert.
Mesora polisnan a cuminsa bay e direccion y na yegada enberdad a bin topa cu dos auto cu hopi daño material. Un indaccion cu e impacto tawata uno fuerte.
Loke nos a compronde na e sitio tawata cu e Chevrolet Spark shinishi tawata bayendo pariba y pa motibonan desconoci a hala na su man robes. Aki ta unda ela dal por bisa frontal contra un Toyota Tercel.
Den e Spark tawata tin un dama na stuur y un mucha di mas o menos 10 aña. E dama lo a dal su pecho hopi duro y tawata keha di masha dolor mes. Pa loke ta e mucha e tambe a resulta herida, y tawata keha dolor di cabes debi na e impacto elo a dal su cabes.
Mientrastanto ambulancenan ya tawata yegando e sitio di accidente.
Materiaalwagen di Brandweer a ser pidi door cu e dama chauffeur di e Spark a keda pega den e auto. Despues di algun rato y bou guia di un Paramedico bomberonan a yuda libera e dama. Ambulancenan na e sitio despues di a stabilisa e dama herida a sali tanto cune y e mucha pa Hospital.
Chauffeur di e Tercel a wordo controla na e sitio mes door di otro Paramedico.