Recientemente CAFT a entrega na Gobierno un rapport di analisis di overtime den Gobierno. Minister President y Minister di Husticia a reuni cu e Departamentonan cu mas ta traha overtime. Esakinan ta Cuerpo Policial, KIA, Brandweer, Warda nos Costa, CEA, IASA y Aduana.
“Nos a duna e Departamentonan e analisis di CAFT cu e peticion pa nan indica cual di e recomendacionnan cu nan ta bay aplica mesora pa baha gasto di overtime y pues gasto di personal. E reto pa logra e norma di gasto di personal pa 2020 ta grandi y ta rekeri sacrificio di nos tur. Tambe den gasto di overtime. E overtime cu ta genuinamente necesario, claro cu nos lo paga, pero caminda e no ta necesario, mester corta”, Minister President a duna di conoce.
Minister President a indica cu e recomendacionnan di CAFT ta varios, entre otro pa Departamentonan tin miho control riba overtime y cuanto nan ta gastando teniendo cuenta cu presupuesto; pa pone un ‘cap’ di entrada pa traha overtime pa cada empleado; condiciona overtime solamente pa esnan cu no tin AO; varia e werkrooster.
E gastonan halto di overtime ta wordo causa pa falta di personal, pero e Departamentonan tin e impresion cu tin tambe cierto abuso ta tuma luga. Gobierno ta spera di por combati e abuso aki cu e recomendacionnan di CAFT.
“Un cos ta sigur, e gastonan di overtime di Pais Aruba ta aproximadamente 25 miyon florin, y esaki mester baha considerablemente”, segun Minister President Evelyn Wever-Croes.
E sigiente reunion lo tuma luga dentro di poco y Gobierno ta spera di tin un posicion final den e problematica aki, pronto.