Parlamentario Alan Howell Scapa di un aanwijzing no mester ta un discusion politico

Parlamentario di POR, Alan Howell ta contento cu Aruba no a haya un aanwijzing siman pasa durante Conseho di Minister di Reino, esaki pa e parlamenario ta un indicacion clave cu Reino Hulandes ta mira e adelanto y trabou duro cu Gabinete Wever-Croes a bin ta haciendo pa loke ta finansa di nos pais.
El a indica cu e, mescos cu henter Aruba por a tuma nota di e gran noticia cu nos isla no a haya un aamwijzing di Hulanda y cu esaki tin di haber cu e echo cu Prome Minister a bin ta mustra e mehoracion cu tin pa loke ta maneho y gobernacion di Pais Aruba. Esaki naturalmente ta inclui tambe e manera con pa atende cu fondonan publico bahando e debenan di nos pais y logrando un surplus di 25 miyon den e presupuesto pa aña 2020 cual mester wordo aproba ainda pa Parlamento.
Alan Howell a indica cu e tema di aanwijzing a bira un discusion politico na Aruba, cual den su concepto no mester ta asina. Loke ta importante, segun e parlamentario di POR ta cu Aruba no a haya un aanwijzing y tur esnan cu ta stima y ta biba riba e isla aki mester ta contento cune. “Personanan cu pa un of otro motibo no a keda contento cu Aruba no a haya un aanwijzing no por ta stima e pais aki”. Howell a expresa.
Finalisando el a bisa cu Fraccion di POR lo sigui haci nan trabou pa zorg cu Gobierno maneha e fondonan publico y goberna manera pueblo ta desea.