Home » Parlamentario Michael Lampe: Aruba tin un gobierno cu ta duna poco pa ranca hopi for di pueblo

Parlamentario Michael Lampe: Aruba tin un gobierno cu ta duna poco pa ranca hopi for di pueblo

by Admin
0 comment 67 views

Pa dos aña largo, pueblo di Aruba a conoce un gobierno cu a traiciona e confiansa cu pueblo a dune, dor di hiba un maneho cu ta liña recta contra di tur e promesanan cu a wordo haci na pueblo.

Parlamentario pa fraccion di AVP, sr Michael Lampe ta mustra cu desde e prome dianan di gabinete Wever Croes, pueblo a cuminsa ripara cu e gobierno aki no ta bay cumpli cu tur e cosnan bunita cu a wordo priminti na pueblo.
Segun sr Lampe, tur decision cu a wordo tuma pa gobierno di Prome Minister Evelyn Wever Croes, tabata decisionnan cu no tabata na interes di pueblo pero si na interes di un grupito cerca di e mandatarionan di e actual gobierno.
“Na momento cu gabinete Wever Croes a sinta, por a scucha palabranan elocuente di Prome Minister y su Minister di Finansa, kendenan lo a atende cu e situacion financiero di gobierno, sin cu nan lo a tuma un solo medida contra di pueblo.

Apenas algun siman den gobernacion, pueblo a wordo informa cu gabinete Wever Croes lo ranca miyones for di su cartera implementando un aumento di BBO cu a tuma pueblo di sorpresa.
Dos di e actual Ministernan di gabinete Wever Croes, esta Minister Glenbert Croes y Minister Andin Bikker durante di campaña electoral a informa pueblo cu e ‘bestaanminimum’ no ta loke e mester ta y cu ningun cas di famia lo por biba riba loke tabata e salario minimo.

Awe e promesa di Glenbert Croes pa regla e salario minimo nunca a tuma luga y e ‘bestaansminimum’ real cu CBS a publica recientemente, ta mustra con serio e situacion a bira awor bou di e gobierno actual.
Minister Glenbert Croes y Minister Xiomara Ruiz Maduro a priminti pueblo cu lo importa gasolin mas barata pa alivia e presion cu tin riba pueblo y hasta a papia di un kabel submarino pa pueblo haya coriente mas barata for di Colombia.
E dianan aki prijs di gasolin a bolbe subi y hunto cu a implementacion di accijns di parti di Minister di Finansa for di dos aña pasa, e situacion a bira pio y e presion riba cartera di pueblo ta sigui.
Aruba tin un Prome Minister Evelyn Wever Croes kende a elogia su primo y colega Minister Glenbert cu el a logra un acuerdo pa reapertura di refineria di San Nicolas y a sigura pueblo cu nan tin solucion pa Aruba y San Nicolas bolbe haya su refineria.

Sinembargo apenas algun dia como Prome Minister y encarga cu e proyecto aki, Evelyn Wever Croes ta dirigi un carta pa oficina di abogado di su tata, pa busca tur forma pa mira con ta anula e contract cu CITGO y esaki a culmina den ultimo dianan di 2019, caminda Evelyn mes ta informa pueblo, cu CITGO tin cu bay for di Aruba.
Como miembro di oposicion Minister di Salubridad Dangui Oduber tabata grita corupcion cu e proyecto di hospital, a pidi pa investigacion y cu e maneho di gobierno e tempo ey tabata malo.

Dos aña den gobernacion Minister Oduber ta cumpliendo na realisa proyectonan cu gobierno di AVP a laga atras y te ainda no a logra di drecha e situacion di e proyecto di expansion di hospital y no a cumpli cu su promesa di drecha cuido medico pa interes di henter pueblo.
Gabinete Wever Croes y Minister Glenbert Croes a pone miyones un banda pa un plan social cu lo a drecha bida di tur esunnan den necesidad, lo a percura pa bin cu leynan pa proteha esunnan victima di abuso pero dos aña despues, ainda nada di e plan social aki.

Solamente e hecho cu gobierno di Reino hunto cu CFT a obliga gabinete Wever Croes pa elimina e fondo adicional aki, ya cu miyones di e fondo ya caba a bay pa paga salarionan di hendenan cerca di gobierno y ainda no tin mucho claridad riba kico gobierno kier haci.
Promesanan haci cu a wordo hinca den un baul di olvido pero pueblo awor ta soportando un maneho di austeridad nunca bisto anteriormente di gabinete Wever Croes,” Parlamentario Michael Lampe a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio