Merca ta conta cu un total di 85,356 caso di e virus y 1,246 morto.
Washington, Estados Unidos – Gobierno di Donald Trump ta pidiendo varios pais ayudo cu donacion o benta di equipo medico pa bringa e COVID-19 virus. Merca ta pidiendo di material basico manera hand sanitizer te cu equipo medico mas complica manera respirador medico (ventilator).
Un lista di 25 articulo a wordo manda pa embahada di varios pais, pidiendonan pa por fabor yuda nan haya e articulonan menciona riba e lista. E lista a inclui articulonan basico manera saconan pa wanta articulo contamina (biohazard bags), e mask N-95, handschoen, paña di proteccion, goggles, pak protectivo (hazmat suit), hand sanitizer etc.
E equiponan menciona por wordo considera articulonan basico cu un hospital mester, tambe a wordo pidi equipo mas esencial y dificil pa haya. Machine respiratorio y purificador di aire tambe a wordo pidi.
No ta conoci cuanto pais Merca a peticiona pa ayudo. Tambe, e carta no a menciona si Merca kier cumpra e articulonan aki o si nan mester e como donacion. E peticion cu Presidente Trump a haci a bin despues cu e mes ta nenga di pone na vigor un plan gubernamental titula ‘Defense Production Act’.
E plan aki basicamente ta permiti pa e materialnan necesario wordo produci y hiba na cada estado Mericano y nan hospital.Gobierno di Sur Korea, Presidente Moon Jae-in a laga sa cu Presidente Trump a pidie personalmente pa yuda Merca cu equipo medico. E peticionan aki ta wordo haci den priva, paso den publico e Presidente Mericano a declara cu Merca lo nunca roga otro pais pa ayudo.
E aña aki ta uno di campaña electoral, y Presidente Trump no kier admiti na su pueblo y sostenedornan cu Merca ta zwak para pa e lucha contra COVID-19. Na e momento aki Merca ta conta cu un total di 85,356 caso di e virus y 1,246 morto.