Home » Clyde Harms: Hamber cu Harpun di Pisca?

Clyde Harms: Hamber cu Harpun di Pisca?

by Admin
0 comment 160 views

 

 

Mi ta hinca mi mes den e debate como un ex-piscador cu harpun. Ami tabata un di e prome Arubianonan cu a practica spear fishing na Aruba.  Esaki tabata na 1949, hopi aña pasa! Mi ta kere cu 90 % di esnan cu ta lesando e articulo aki ni sikiera a nace ainda.

E tempo ey, spear fishing tabata djis un otro deporte nobo cu algun Arubiano a gusta. No tabatin protesta contra di dje. Te hasta, “Lorito Real”, e semanal di Sr. “Pachi” Jonkheer, a haci un caricatura di mi cu mi ekipo di spear fishing. M’a laga spear fishing pa mi por a dedica mas tempo na baseball 

 

Aparentemente, den añanan cu a sigui, spear fishing a bira enemigo di ambientalistanan. Hopi estudio haci pa diferente entidad cientifico renombra mundialmente a coclui cu piscamento cu harpun ta dañino pa nos ecologia. Piscadonan cu harpun ta scoge un pa un e pisca cu e kier coge y piscadornan cu harpun, entre otro, ta mata e piscanan mas grandi cu ta recrea otro pisca grandi, lagando e mas chikitonan so. Ningun otro forma di pisca ta ofrece e piscado e selectividad manera piscamento cu harpun.

 

Parce cu Ministernan di Husticia (Sr. Bikker) y di Transporte, Telecomunicacion y Sector Primario (Sr. Romero) ta haya nan mes den un situacion dificil pa haci un decision similar na hefenan di estado cu mester scoge entre opcionnan causa pa COVID-19. Ta bay cu ciencia, of ta scoge pa nan antoho (capricho?).Ta bay di acuerdo pa permiti piscamento cu harpun of ta tene nos pais na convenionan inernacional cu ta producto di e estudionan cientifico.

 

E argumento di esnan cu kier elimina e prohibicion pa algun piscado sin trabou cu ta “pasando hamber” por busca cuminda cu su harpun no ta convence mi. Nan mester busca un harpun, locual lo costa nan hopi mas cu un bol si liña y algun anzue. Nan por pisca di barancanan si bay den un boto. Y si nan a tene nan mes na nos leynan, nan y nan harpun bieu mester ta hopi frusto. 

 

Manera redaccion di un corant ta remarca, tratadonan internacional no conoce suspension temporal. Mi ta kere cu Aruba mester bay cu ciencia y no mishi cu e tratadonan internaconal cu a bin na vigor despues di hopi studio cientifico. Mi no ta kere cu un supension temporal ta e solucion pa nos piscadornan cu ta “pasando hamber”, y tampoco lo beneficia pueblo di Aruba.   

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio