Polisnan haciendo un tremendo trabou y sigur merece un elogio pa nan pasenshi y con nan a trata y a logra move e aglomeracionnan grandi di hende cu tabata tin den Oranjestad.
Recientemente Gobierno den e fase di re-apertura di nos economia, despues di mas cu dos luna cera awo a permiti pa barnan por habri bek. E ora di cierre ta actualmente 10’or di anochi, esaki pa duna e doñonan un chens di draai nan negoshi y tambe pa e pueblo por pasa un rato ameno y distrayi un poco despues di tabata mas cu dos luna cera den nan cas. Esaki no ta suficiente pa algun persona y cu ta sigui bebe riba caya, negoshinan cu ta purba nan suerte di keda toch un tiki mas habri, esaki tabata e caso diasabra anochi tambe.
Oranjestad: Diasabra den careda di 11’or di anochi presencia di polis a wordo pidi cu urgencia den Dominicanessenstraat, pazuid di misa San Fransisco. Esaki pa un grupo di hende para pafo di un establecimento ta bebe y di golpi cos a bay for di man. Nan a cuminsa tiramento di piedra y of botter.
Na yegada enberdad nan ta topa cu un grupo grandi na e sitio y polis mesora a bay atende cu nan, a rista tur e personanan aki y nan autonan pa mira si nan por topa cualke cos sospechoso. Despues cu nan a caba polis a duna nan ordo pa no sigui bebe riba caya pero pa nan bandona e sitio y busca caminda di cas.
Despues cu e grupo di polis a logra caba cu e aglomeracion di hende pazuid di Misa San Fransisco, nan a bay cu mas patruya di otro di districto tambe, direccion di Linnear park.
Na yegada na Linnear Park, enberdad nan a topa cu establecimentonan cera, pero SI cu un multitud masha grandi di hende, mas cu 100 auto staciona riba e parkeerplaats dilanti di Talk Of the Town, autonan cu bahul habri, un sin fin di bebemento di alcohol y cu musica duro riba caya.
E patruyanan a acerca multitud for di diferente angulo y a cuminsa duna nan ordo pa paga e musica, stop bebemento riba caya y cuminsa busca caminda di cas. Den algun minuut e polisnan a logra kibra full e algomeracion enorme aki di hende. Polis a para trafico y a guia trafico pa asina hopi liher tur auto por a move for di e sitio, parti lamentabel ta cu mientras polis tabata duna ordo na e hendenan pa bandona e sitio, den e multitud nan a bin topa cu nan propio colega cu mester sa miho, cu no tabata mantene su mes na e reglanan.
Den mas o menos 15 minuut a reina un silencio riba Linnaer park, tur hende a move for di e sitio, sin cu polis mester a uza forsa of detene un of mas persona. Mester bisa cu polis a haci un bon trabou y a actua hopi profesional.
