ORANJESTAD – Departamento di Asuntonan Economico, Comercio y Industria mediante su unit di Iniciativa pa Desaroyo pa Empresa Arubano (IDEA) a organisa un Webinar cu su partner Departamento di Naturalesa y Medio Ambiente (DNM) riba e ley di Single-use Plastic Ban cu lo drenta oficialmente na vigor dia 1 di juli 2020.
Den aña 2015, un total di 193 gobernantenan rond mundo cu ta miembro di e organizacion di Nacionnan Uni a firma un acuerdo pa e resolucion pa transforma nos mundo: ‘e Agenda 2030 pa un Desaroyo Sostenibel’(SDGs). Aruba cu ta pertenece na e reino hulandes, a tuma e metanan di Desaroyo Sostenibel den su programa di gobernacion. E metanan aki ta parti den 3 diferente topico, People, Profit y Planet. E Departamento di DNM ta encarga cu e topiconan aki.
E ley di prohibicion di productonan cu ta haci daño na nos medio ambiente, ta pa garantisa un futuro sostenibel di nos naturalesa y medio ambiente pa nos futuro generacion. No ta tur productonan cu ta hasi daño na nos medio ambiente por wordo prohibi den un solo biaha. Solamente un cierto di e productonan cu ta conoci cu tin un efecto negativo y dañino na nos medio ambiente, a wordo anota den nos ley di prohibicion. E ley aki a wordo aproba pa Parlamento dia 27 november 2019, y a wordo publica dia 2 di december 2019. E lo drenta oficialmente na vigor dia 1 di juli 2020.
Pa e motibo aki IDEA a disidi di organisa un webinar pa informa nos comerciantenan y pueblo di Aruba tocante e cambio aki y esaki a wordo presenta dia 11 juni 2020, cu tawata inclui dos topico:
Awareness on the Single-use Plastic Ban for Entrepreneurs;
How We can adapt to a Circular Economy.
Prome parti: “Awareness on the Single-use Plastic Ban for Entrepreneurs”
E webinar aki a wordo presenta door di sra. Vivianne Gomez. Sra. Gomez tin un Master Degree den kimica y ta trahando como Policy Advisor na Departamento di Naturalesa y Medio Ambiente (DNM).
Sra. Gomez a presenta e.o.:
cua ta e articulonan/productonan cu ta prohibi y pakiko nan ta prohibi;
cua ta e alternativanan cu tin y cua ta e actonan cu ta prohibi;
con bo ta reconoce e materialnan plastico y ‘polystyrene’;
cua di e cremanan di ‘sunblock’ ta prohibi;
pakiko e cremanan di ‘sunblock’ cu ta contene ‘oxybenzone’ ta prohibi.
Segundo parti: “How We can adapt to a Circular Economy”
E siguiente orador srta. Kareesha Mohamed, tin un Bachelor degree den Economia Comercial y un Minor den Economia Circular y Innovacion di Negoshi. Srta. Mohamed a sa di presenta e siguiente topiconan informativo y interesante tocante Economia Circular:
kiko ta Economia Circular;
dicon e ta importante pa Aruba;
con companianan por adapta na un modelo di negoshi cu ta circular;
con gobierno por yuda stimula un Economia Circular;
con nos como habitante di Aruba por yuda stimula un Economia Circular.
E webinar aki a haya un participacion di un total di 45 persona. IDEA ta sumamente contento cu e contenido y acogida di e webinar aki y tambe di e bon comentarionan ricibi di su participantenan. Un seccion di topiconan sigur hopi interactivo cu hopi pregunta di parti di e participantenan y un tremendo presentacion di parti di tur e 2 oradornan.
Tambe IDEA kier remarca cu nan lo sigui organisa mas webinar cu lo wordo dedica na un y tur cu kier cuminsa un negoshi of tin un negoshi existente y kier educa nan mes riba diferente topiconan comercial.
Un danki na tur e participantenan y un danki special na tur e presentadornan cu a comparti nan experticio cu tur esnan cu a join e webinar. IDEA ta gradici Departamento di Naturalesa y Medio Ambiente cu ta un partner grandi tras di e webinar aki. Keda pendiente pa mas eventonan den aña 2020 cu lo wordo organisa door di IDEA.
Por sigui nos riba Facebook page @Idea-Aruba pa mas webinar y otro actividadnan di IDEA den futuro. IDEA ta sigui brinda su servicio di duna informacion na clientenan virtualmente. Aunke e cliente no por wordo atendi ainda na nos oficina, por mail na [email protected] of [email protected] of por yama IDEA na 521-2439/440 pa haya tur informacion necesario.
