Oranjestad, Aruba – Abuso sexual, violacion y acoso ta algun experiencia cu ta duna impresion di ta hopi comun den nos comunidad. E experiencianan ta asina doloroso y traumatico cu personanan ta pasa añas sin por a expresa locual a sosode.
Den preparacion pa e manifestacion di 3 di Juli, varios persona a bin dilanti pa conta nan storia di abuso riba Facebook. Por a observa cu gran mayoria di esnan cu a bin dilanti ta hende muher hoben. Ta claro si cu abuso sexual ta sosode cu mucha homber y hende homber tambe, pero kizas e berguensa di locual a sosode ta silencia nan.
Varios storianan anonimo a wordo publica. E miedo pa problema o represaya ta logico. Asina mes varios persona a pone nomber y a hasta publica potret di e abusador pa asina alerta otronan pa tene cuiduo.
Por a tuma nota cu den mayoria caso, e abusador ta un persona conoci pa e victima. Tambe e abusador tin varios persona cu e a haci victima. Hopi di esnan cu a presenta nan storia tawata mucha o teenager ora e abuso a sosode, pero tambe tawata tin algun hende cu tawata adulto ora cu e abuso a tuma lugar.
Hopi di e abusadornan ta tata, bisiña, padrastro o amigo di famia di e victima. Tambe por a mira acusacionan serio a wordo treci dilanti contra deportisa, miembro di scouting, docente di scol secundario etc. Pues organisacionan ta faya y no ta mustra di tin un maneho solido di con pa anda cu e asuntonan aki.
No solamente organisacionan, pero famianan tambe ta faya. Por a nota cu algun persona cu tawata tin e curashi di expone nan abusador como un miembro di famia, a haya nan ta mira con ainda nan abusador ta forma parti activo di e famia. Ainda e abusador ta wordo invita pa tur fiesta di famia, pues e seriedad di e daño cu e abusador a haci no ta wordo tuma na serio.
Por a mira tambe con esnan cu a purba busca ayudo a wordo faya pa motibo di un falta di castigo penal pa e malechor. E storianan di abuso ta asina hopi, y den mayoria di caso (si no ta casi tur) e malechor no a ricibi castigo pa su acto.
Den e experiencianan cu a wordo treci dilanti, tambe mester bisa cu ta poco a indica cu a ricibi e ayudo psicologico necesario pa por anda cu e trauma severo cu ta bin di abuso sexual. Persona cu hayanan victima di esaki mester haya ayudo. E trauma ta causa cu e victima tin e chens di desaroya depresion, ansiedad, PTSD o hasta adicion pa deal cu e dolor emocional.
Esnan interesa den e lucha pa haya husticia pa victimanan di abuso sexual, particularmente pa proteha muchanan contra esaki, por join e manifestacion cu lo tuma lugar 3 di juli.