Den e ultimo tempo aki hopi hende ta biba cu stress y insiguridad di nan futuro. E perdida di un persona su entrada financiero y e habilidad di purba enfrenta e reduccion di salario pa paga tur debe y cumpra cuminda, por contribui na hopi ansiedad.
Mirando cu hopi hende ta perde trabou y otro ta perde nan ser kerinan door di morto, no ta nada straño cu un pandemia di salud mental ta na caminda. Den un situacion asin’ki cu ta for di nos control, kico si nos tin den nos gara? Con pa atende cu nos salud mental?
Actividad fisico y su rol pa proteha nos salud mental
Haci movecion riba un base regular ta contribui na nos bienestar y e sentimento di calma. Durante ehercicio nos curpa ta produci un kimico den nos celebro cu yama ‘endorphins’ cu ta duna e persona un sentimento di bon humor. Tambe den e temporada aki cu ta for di nos control, ehercicio por sirbi como un distraicion unda cu e ta yuda nos busca nos paz interno y kibra e ciclo di negativismo cu ta circula den nos mente. Den e ultimo temporada, depression y ansiedad ta dos sentimento cu hopi di nos ta experencia, akinan tambe ehercicio ta hunga un rol hopi grandi na baha stress, mehora memoria, yuda drecha e humor y hopi importante e ta yuda nos drumi miho anochi.
Solamente -30 minuut di ehercicio tur dia- por yuda mehora nos estado mental.
Por hasta pensa pa cuminsa un deporte nobo of forma parti di un grupo chikito cu ta haci movecion y cu ta sigui tur e reglanan di protocol.
Drumi suficiente
Manera menciona caba drumimento anochi ta hunga un rol riba nos bienestar mental.
Drumi suficiente anochi ta yuda recarga nos curpa y mente cu asina nos por pensa y funciona bon durante dia.
Traduci y parcialmente adapta for di: https://www.helpguide.org