Home » Historia di Aruba: 40 aña di e tragedia di Boca Mahos, entrevista cu Sra. Vda. Jacintha Erasmus Maduro

Historia di Aruba: 40 aña di e tragedia di Boca Mahos, entrevista cu Sra. Vda. Jacintha Erasmus Maduro

by Admin
0 comment 237 views

Historia di Aruba: E biaha aki nos lo dedica un articulo na un sucedido hopi tristo den cual dos primo cu tabata na e “wrong place at the wrong time” a perde nan bida.

Na Aruba nos conoce varios boca di lama. Un di mas conoci ta Boca Mahos, e boca aki ta y tabata wordo hopi bishita, Boca Mahos tin su historia.

Criamento di tribon y otro pisca grandi na Boca Mahos
Den añanan 70 pa 80 e tabata e sitio unda diariamente tabata tira carni afgekeurd y restonan di bestia, cu wordo mata na Abattoir. Esaki na dado momento a bira un actividad di cual tur dia na e mesun ora hopi hende tabata bay para na e rand di e boca pa mira con e piscanan grandi y tribon tabata drenta den e boca pa come.
Na e rand di e Boca tabata tin algo traha di cement caminda e trucknan tabata para.

Mirando cu Aruba tabata y ta un isla turistico, despues cu a cuminsa ripara cu piscanan grandi y tribonnan tabata yega hopi cerca di nos costanan, a dicidi di stop di crianan y asina a para e tiramento di e restonan di bestia den lama.

suicidio y hogamento
Un otro historia tristo di Boca Mahos tabata, cu akinan hende a yega di cay den lama y a hoga, tambe tin hende cu a yega di comete suicidio y otro cu a trata na comete suicidio.

Boca Mahos tin un otro historia hopi tristo na cual nos lo dedica nos mes na dje, dia 22 di november proximo lo cumpli 40 aña di e tragedia tristo aki.

Victoriano y Jorge Erasmus a sali bay pisca na baranca
Diasabra 22 di November 1980, den careda di 5’or y mey di mainta, Victoriano ta lanta for di soño, na momento cu su primo Jorge Erasmus a bay bati na su porta di cas, puntrando Victoriano pa nan bay pisca. Manera ta custumber e dos primonan aki semper tabata bay pisca na baranca. Na prome instante Victoriano a bisa su primo cu awe e no por bay pisca, paso e tin afspraak cu un persona pa 9’or di mainta, tocante un trabou di construccion. Despues di un rato e la cambia di idea y a dicidi toch di complace cu su primo, pero  Victoriano a bisa su primo cu e ta bay dijs un rato so. E la bisa su señora pa hala su afspraak di 9’or pa 10’or y asina e la prepara su cosnan di pisca y hunto cu su primo nan a bay na pia, pasa den mondi y rumbo Boca Mahos, sin sa kiko tabata speranan un rato despues.

Victoriano tabata tin 42 aña, tata di famia, e tabata casa cu Jacintha y for di e matrimonio a nace 4 yiu y manera su tata e tambe tabata haci trabou di metsla.

Jorge Erasmus tabata tin 47 aña y tabata casa cu Ida, kende tabata tin un yiu muhe. Jorge cariñosamente tabata wordo yama Hory. Hory tambe tabata haci e mesun ofishi cu su primo y su tata, cu ta trabou di metsla.

Jacintha casa di Victoriano a bay traha henter dia na playa
Tur cos tabata mustra un Diasabra mainta masha normal, e dos hombernan a bay pisca, e yiunan di Victoriano tabata drumi ainda pa motibo cu e dia anterior nan a bay fiesta di bruid di nan prima. Sra. Jacintha a bay traha, henter mainta tabata hopi druk na trabou y Jacintha no por a bay cas merdia y a dicidi di manda cuminda cas pa su yiunan, keriendo cu su casa lo a yega cas caba y cu e lo parti e cuminda pa nan yiunan.

 

Jacintha a sali bay busca su casa
Den careda di 6’or ney señora Jacintha a caba di traha y algo despues di 6’or Jacintha a yega cas y su yiunan a bis’e cu nan tata no a yega cas ainda.Jacintha mesora a bay puntra na cas di un primo, e tampoco no sa nada di nan. Un señora cu a yega na e cas di e primo na e momento ey, a hiba Jacintha bay tira bista bandi lama, pa mira si ainda nan lo por ta piscando. Na yegada na Boca Mahos nan a mira cu D.O.W. a pone baricada, e s puntra otro pakiko, te hasta Jacintha a contesta cu por ta paso eynan ta peligroso, ainda nan no tabata sa kiko a pasa.
Na Boca Mahos nan a topa cu ruman di Jorge, kende tabata traha na Natural Bridge  y e a bisanan cu ora e tabata bayendo su trabou, den careda di 8’or di mainta, e la topa nan ta pisca riba e baranca na Boca Mahos.

Despues durante noticia na television nan a bin haya sa cu un pida baranca di mas o menos 100 meter di largo y 3 meter hancho a cay den lama, esaki a sosode net unda e trucknan tabata tira e restonan di bestia cu wordo mata na abattoir.

Famia a dicidi di bay polis
Solo a cuminsa bay awa, niun holo ni color di e dos primonan y e famia a dicidi di bay polis pa pidi ayudo. Na prome instante polisnan tabata sa cu algo no ta bon, pero asina mes a trata na consola e famia, bisando nan cu por ta e dos primonan a bay un otro lama pa sigui pisca. Mirando cu tabata scur caba y eybanda ta un area peligroso, polis mes no por haci nada mas. E tempo ey no tabata tin ekiponan y ni helicopter manera awendia. Un meneer di fam Bosch a bisa e famia cu nan lo bay trata na busca e dos primonan, pero si enberdad nan a bay busca no ta conoci tampoco.

E anochi aki tabata un anochi pa e famianan Erasmus un anochi largo y di angustia, cada rato nan tabata bay para na e porta di cas pa mira si nan tata of casa por cana yega, pero nada te cu di dia a habri nan no a regresa cas mas.

Mainta trempan famia a sali pa bay busca e dos primonan
Diadomingo dia 23 di november 1980, mainta ta habri y varios miembro di famia Erasmus a sali bay direccion di lama pa sigui busca nan sernan keri. Mientras nan tabata buscando den area di Boca Mahos bin abou, un persona cu tabata canando banda di Boca Chikito a topa cu un curpa ta drief den lama, (Boca Chikito ta keda poco pariba di Kapel di Alto Vista). E persona mesora a bati alarma.

Brandweer a logra saca e curpa di Jorge for di lama
Polis y brandweer a presenta na Boca Chikito pa asina cuminsa na saca e curpa sin bida cu tabata drief den e boca. Na momento cu a saca e curpa a pidi pa un of mas miembro di famia Erasmus pa bay na Boca Chikito pa reconoce e curpa. Enberdad e curpa a wordo identifica como di Jorge Erasmus, e tabata den un hopi mal estado y a ricibi hopi golpi na cabes.

Curpa sin bida di Victoriano a wordo treci tera
Poco rato despues nan a bin mira un otro curpa ta drief un 150 meter mas leu di caminda a haya e curpa di Jorge Erasmus. Personal di Brandweer a logra saca e otro curpa, cu tabata di Victoriano Erasmus. e curpa di Victoriano tabata den un poco mas miho estado compara cu di Jorge. Dr. Ridderstap a bay na e sitio pa constata morto di e dos primonan.

Noticia a core hopi lihe rond
E tempo ey no tabata tin celular y ni internet, pero asina mes noticia tabata core hopi lihe rond di nos isla. For di tur skina di Aruba a yega hende na Boca Chikito, pa mira con e dos curpanan tabata wordo saca for di awa, te hasta na dado momento polis mester a interveni pa motibo cu algun di e mironesnan tabata te hasta pone nan bida den peliger djis pa haya un bista con e curpanan di e victimanan a keda.

Dera mesun dia
Zepp Wever dfm a bay na e Boca Chikito pa busca e dos curpanan aki, pero mirando cu e curpanan tabata den hopi mal estado, nan no por a bay den cooler.  Jorge y Victoriano a wordo dera riba e mesun dia aki. E entiero a tuma luga den oranan di merdia pa atardi, e dos primonan a wordo dera den santana di Paradera.

E derumbe di e baranca na Boca Mahos mester a sosode den oranan di mainta
E derumbe di e baranca na Boca Mahos a wordo descubri te den oranan di atardi, pero despues cu a saca e curpanan for di awa, tur cos tabata indica cu e curpanan aki lo mester tabata mas largo den lama. Tur cos tabata mustra cu e derumbe a sosode hopi mas prome. Si tene na cuenta cu e  ruman di Jorge a topa nan 8’or riba e baranca ta pisca y tambe cu Victoriano tabata tin un afspraak 10’or di mainta y no a presenta pa su afspraak. Ta calcula cu e derumbe a sosode despues di 8’or y prome cu 10’or di mainta caba.

Kizas un aviso cu a wordo ignora
Algun dia prome cu e tragedia, Victoriano tabata piscando un poco mas pabou di Boca Mahos e la scucha un zonido duro un poco mas pariba di dje y ora e la cana bay mira kiko por a sosode, e la mira cu na Boca Mahos bandi pabou, un pida di e baranca a cay den lama. Kizas e por tabata un aviso pa nan no bay pisca eynan y nan no a worry cu esaki. Segun e Señora di Victoriano, su casa no tabata gusta pisca na Boca Mahos, mayoria di biaha e tabata pisca mas pabou di Boca Mahos of na Boca Budui, cu ta keda un poco mas pabou ainda.

Dia 22 November proximo ta haci net 40 aña di e tragedia aki. Un tragedia hopi tristo y cu por bisa e dos persona nan aki tabata na e “wrong place at the wrong time”.

Atraccion Turistico
Den e ultimo añanan aki, a descubri un natural pool patras di e pida baranca grandi cu a cay den lama. E natural Pool hopi lihe a bira un atraccion no solamente pa local pero te hasta tournan di Jeep, UTV etc sa haci un stop eynan. Via un trapi small di palo hendenan ta baha bay abou y patras di e barancanan tin e Natural Pool. Hopi hende cu ta baha ey bou pa landa, no sa of no ta corda e tragedia aki mas, cu a sosode 40 aña pasa. Boca Mahos un biaha mas a bira un sitio atractivo, antes pa mira con piscanan grandi y mayoria biaha tribon tabata drenta den e boca y awo un sitio turistico cu un beyesa di Natural Pool.

Ta controla e kraaknan bou di e barancanan?
Enberdad e ta un sitio hopi bunita, pero hopi peligroso tambe, no solamente e haltura y e trapi small, pero tambe pasobra no ta conoci si ta controla e kraaknan bou di e baranca aki, ban spera cu no tin mas kraak peligroso y mucho menos  cu no ta existi un posibilidad cu pida baranca por kibra y cay riba e hende den e Natural Pool aki.  Despues di e sucedido 40 aña pasa, pa hopi tempo tabata tin baricada pa no yega cerca di e rand di Boca Mahos. Despues a pone borchinan di advertencia pa no para cerca di e rand, pero awendia no tin nada poni y nos ta spera cu lo tin un of mas instancia cu ta controlando e costa panort pa barancanan cu ta gekraak, cu por cay y ta forma peligro pa hende.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio