Multitud grandi diasabra anochi den Hot Zone debi cu establecimiento conoci tawata bende alcohol estando “cera”

J.E. Irausquin Blvd – Hot Zone

Diasabra anochi laat, durante cu e orario di ciere tawata acercando, polis a haya informacion di un multitud enorme na un establecimiento conoci den Hot Zone.

Na yegada di polis nan a constata esaki. E parkeerplaats tawata yen di hende. Locual ta prohibi debi na e pandemia, y especialmente cu awor e casonan di COVID-19 ta subiendo atrobe aki na Aruba.

Polisnan durante nan control a bin haya e rason tras di e aglomeracion aki, di locual nos a compronde cu varios di esnan presente tawata parti di un grupo cu polis a intercepta den un off road un rato prome.

A resulta cu e bar dilanti berdad tawata cera, pero parti patras (of na banda) polis a ripara cu e bar toch tawata bendiendo alcohol. Polis a duna ordo mesora pa cera y a duna e  establecimento un boet.

Pues asina nos por mira cu tin algun establecimento ta tuma e riesgo di sea keda habri despues di 11’or of ta haci actonan clandestino manera esaki. 

Gobierno entrante December 5 a bin cu algun medida pa segura e salubridad publico y pa preveni mas contagio di e virus. E medidanan por wordo considera como bastante suave, y lo ta vigente pa dos siman. 

Lamentablemente e potretnan aki ta refleha cu ainda tin gruponan no ta tene nan mes ni na e minimo di reglanan, esta e social distancing.

No ta solamente e grupo, pero tambe esnan cu ta responsibel pa e establecimiento cu ainda tawata bende bebida alcoholico. 

Manera cu polis a dune ordo pa cera un multitud grandi a bandona e sitio.

Autoridad a sa di tene linear park bou control diasabra anochi cu nan presencia, y a evita cu tawata tin aglomeracion di hende.

Pero asina mes, esnan den e ‘grupo’ ta pensa otro sitio pa reuni.