ORANJESTAD – E recuperacion economico di Aruba ta depende grandemente di turismo. Turista lo sigui yega nos Pais y lo bolbe bek dependiendo di con sigur nan ta sinti nan mes na nos Pais durante e pandemia aki. E prome impresion di con nos Pais ta trata cu e seguridad y salud di nos bishitantenan ta hopi importante. Den cuadro di esaki Minister Maduro di Economia a haci un bishita cortico na aeropuerto pa por haya un bista di e trabounan cu e team di DVG ta haci na aeropuerto na momento cu pasaheronan mester presenta of haci nan testnan di COVID19. Minister Maduro por a experencia cu e trabou cu e team di DVG y algun trahador voluntario di Hyatt ta haci ta hopi bon organisa y ta duna e pasaheronan e confiansa y trankilidad cu Aruba ta trata na un manera hopi serio y profesional cu e pandemia aki na momento cu bishitantenan yega nos Pais. E esfuerso di DVG na aeropuerto ta brinda un sentimento di seguridad cu ta algo hopi positivo y ta yuda e recuperacion economico di nos Pais. Minister Maduro ta gradici colega Minister Dangui Oduber pa e esfuerso continuo pa percura pa e medidanan di seguridad pa e salubridad di nos localnan y bishitantenan ta ‘in place.’ E mandatario ta gradici specialmente sr Michaël van den Poel kende ta na cabes di e team di DVG na aeropuerto pa e guia y splicacion extenso duna di e proceso di test y prevencion na aeropuerto. Minister Maduro ta gradici tambe full e team di DVG y e voluntarionan di Hyatt pa e trabou excelente aki na bienestar di Aruba. Boso esfuerso di tur dia ta yuda reactiva economia di nos Pais.
