Ayera 1 di febrüari 2021 Wardakosta a selebrá su di 25 aniversario. Durante un seremonia simpel, pa motibu di e medidanan di COVID-19, a konmemorá e hechoakí huntu ku personal di Wardakosta i un grupo chikitu di invitado na e puntonan disosten di Wardakosta na Kòrsou, Aruba, St. Maarten i na Hato.
E Direktor di Wardakosta, Frank Boots a duna un spich durante di e seremonia kaminda e la reflehá bèk riba e historia di e organisashon, e futuro di e organisashon i tambe su apresio pa e trahadornan di e organisashon uniko akí den Karibe.
Na aña 1993 a start ku e idea pa un Wardakosta den Karibe kaminda a pone e promé ‘piedranan’ pa por kuminsa forma e organisashon. A dura te ku dezèmber 1995, na momento ku a firma e ‘Voorlopige regeling van de instelling van de Kustwacht’ kual tabata e dokumento ofisial promé ku e ‘Rijkswet Kustwacht’ ku ta vigente aktualmente. E fecha ofisial ku finalmente a establesé e organisashon ku tabata yama na e momento ei ’de Kustwacht voor de Nederlandse Antillen en Aruba’ a bira 1 febrüari 1996.
E ‘Rijksministerraad’ na Hulanda a bai di akuerdo na
1995 pa integrá e unidatnan di Defensa i pone nan na disposishon di Wardakosta. Te ku awe e unidatnan di Defensa i personal di Defensa ta integrá den e organisashon. E personal di Defensa ta traha konhuntamente ku e personal lokal kualnan ta personal sivil huntu ku e propio unidatnan di Wardakosta. Apesar di e diferenshanan den e organisashon, Wardakosta ta funkshoná komo un organisashon i ta aktua komo un organisashon hudisial riba e islanan.
E aña akí, e aña di e 25 aniversario ta marka e komienso di un era nobo pa e organisashon di Wardakosta. Un aña ku kambionan intensivo ku lo nifiká un kresementu pa e organisashon kual lo ser realisá danki na e sosten finansiero di Hulanda. Komo tal, Wardakosta lo por funkshoná mas efisiente pa huntu ku su
partnernan den e kadena hudisial protehá e frontera di e islanan.
Na final di e spich di e Direktor di Wardakosta, kual a ser transmití via di un ‘livestream’ pa e puntonan di sosten, tabata momento pa korta e bolo di e 25 aniversario di Wardakosta. E personal i e grupo chikitu di invitado presente por a gosa di un pida bolo i un bebida pa selebrá e dia memorabel aki.
Henter aña 2021 lo ta un aña festivo pa e organisashon, teniendo kuenta ku e medidanan vigente di COVID-19, den kual lo selebrá ku tur e personal, e ‘stakeholdersnan’, e partnernan den e kadena hudisial i ku e komunidatnan.
Esaki komo muestra di apresio i danki na e sosten duna na Wardakosta den e último 25 añanan.
